Lihkku ávvudemiin GLR!

Walt Disney dajai: If you can dream it, then you can do it!

Dahje jus sáhtát niegadit dan, de sáhtát čađahit dan!

Nils Martinis lei niehku dalle golbmalogi jagi áigge. Mis buohkain leat niegut muhto eat buohkat soaitte duostat čuovvulit daid. Soaitá váilot duostilvuohta čađahit áigumuša dahje eat hálit riskka váldit. Dahje soaitá mis ii leat jáhkku ahte mii oba sáhttit ge. Dan sivas lea erenoamáš ahte muhtumiin min gaskkas lea juste dakkár vuoibmi ja dáhttu olahit nieguid. Ii čuovvut fásta bálgá, muhto baicce rahkadit iežas, sierra bálgá.

Okta diekkár sáŋgár lea Nils Martin. Su niehku lei ásahit báikkálaš rádiokanála. 

Ja dan son dagai ge. Guovdageainnu Lagasrádios lea dál ávvujahki. Nils Martin olahii dan niegu. Dal lea Guovdageainnu lagasrádio doaibman 30 jagi juo! Dehálaš ođasgaskkusteaddji Guovdageainnus ja doppe ráhkaduvvojit áššit mat leat erenoamážit berostahtti guldaleddjiide Guovdageainnus ja sámis. Dat gáibida sierra ja báikkálaš gelbbolašvuođa. Ja GLR`as gávdno juste dat.

Servodat lea duogábealde, ja ii dárbbaš álo akto čoavdit buot.

Radios leat dál guokte virggi, muhto ollugat oassálastet go galgá rádiosáddaga rahkadit. Dát lea midjiide buohkaide muittuhus. Mii maid sáhttit olahit nieguid jus duostat ja jus mis leat doarvái searat ja dáhttu. Ii dieđus juohke árgabeaivi soaitte nu somá gal, ja jáhkkimis leat leamaš maiddái beaivvit goas ii leat nu sihkkar movt galgá birget, muhto juste dalle han maid oaidná ahte servodat lea iežas duogábealde ja ii dárbbaš álo akto čoavdit buot.

GLR`as lea dávjá iežas perspektiiva go rahkada ođasáššiid. Lea čielggaš ahte sis lea mediaváibmu rivttes sajis. Illudan juohke háve go GLR riŋge ja háliida ášši ráhkadit. Dieđan sis leat ollu dieđut ja dasa lassin miellagiddevaš gažaldagat maiddái.

Rádiobiŋgo lea hui bivnnut. Lea ovtta láhkai de go dat árgabeaivveniehku mii sáhttá duohtan šaddat. Vuosttas vuoitu lea stuoris, muhto ii fal menddo stuoris gal. Sáhttá vuos smávit ja de veahá stuorát nieguid olahit jus dan ges vuoitá. Ja ii go leat nu ahte niegut čatnet min oktii.

Jus sáhttit niegadit – de gal sáhttit maid čađahit dan.

Mii dárbbašit searaid nu mo GLR bargiid ja GLR`a. Lea munnje stuorra gudni rahpat ávvodoaluid otne dáppe Guovdageainnus. Oainnán ahte lea hui buorre prográmma ja ligge maid váimmu go mii viimmat sáhttit fas deaivvadit, návddašit ja guldalit sámi musihkka.

Mus leat maid niegut. Ja dan sivas gávnnan mun maid inspirašuvnna GLR`a čađahanvuoimmis.

Jus sáhttit niegadit – de gal sáhttit maid čađahit dan. Ollu váimmolaš lihkku GLR`ii ja lea munnje stuorra gudni go beasan dadjat: Doalut leat dal rahppon!

Čuovu streama dás!