Sáme moattebelakvuohta la mijá gievrrudahka!

Sámevuohta oabllu Lulle-Finnmárkon. Arnhild Olsen Pak guhti la Oarjje-Várjjagis la goalmátkándidáhtta NSR:a åvdås Lulleguovlo válggabijran. Sån vuojnná sámevuohta la vas vuojnnusin Oarjje-Várjjagin.  

– Ienep ulmutja åhtsi berajvuodajis, goappátjagá nuora ja ållessjattuga gårru allasisá gáptijt ja vuosedi sámevuodav ienep gå åvddåla, javllá Olsen.

– Sierraláhkáj nuorap buolva adni árvvusin máhtudagáv mij tjuovvu sáme kultuvrav. Hæhttup gárvvása liehket duostotjit dav berustimev giellakursaj ja duodjekursaj váj ulmutja oadtju vejulasjvuodav ælládahttet ja nannit sámevuodav, javllá Pak guhti iesj la barggam sáme kultuvrrasiebren Min Árbe Oarjje-Várjjagin. 

Muv guhkepájggásasj
ulmme la tsieggit sáme goadev Oarjje-Várjjagij. 

Arnhild berus ednagav sáme æjvvalimsajijs – Muv guhkepájggásasj ulmme la tsieggit sáme goadev Oarjje-Várjjagij. Tjåhkanimsajev gånnå tjadádip giella- ja duodjekursajt, gånnå oahppap ja nannip ietjama sáme kultuvrav. 

Sjuohppim ja giellaåhpadus
Dá giese Ida Lindseth råhtot barggá sjuohppimijn ja bidusmálestimijn sáme mánájn giesseskåvlån Oslon.
– Le galla suohtas vásedit at edna máná oahppi sáme kultuvra birra ja bessi adnet sámegielav dá giese. Muhtema ságasti sámegielav sijdajn, iehtjáda vas ettjin åvvå majdik máhte åvdås diehki båhtin, javllá Lindseth.

Lindseth, guhti la NSR:a listan Oarjje-Vuona válggabijran, la bajássjaddam Lillestrøman dárogielajn sijddagiellan. Sån la iesj vásedam gåktu la oahppat sámegielav vuododáse rájes. 

Buorre sámegiellaåhpadibme máhttá liehket make or break jus ulmutja galggi válldet ruopptot gielajdisá.

– Mån tjuovvuv guhkásåhpadusáv Kárásjjågås tjiehpes åhpadiddjijn. Lej edna barggo daj gålmmå jagen, valla suv diehti åhpadav uddni iesj sámegielav giesseskåvlån, javllá Lindseth.

– Riektá sámegiellaåhpadibmáj joarkkaskåvlån la muv vájmo ássje. Buorre sámegiellaåhpadibme máhttá liehket make or break jus ulmutja galggi válldet ruopptot gielajdisá, joarkká Ida.

Gåvvå: Håkon Sandmo Karlsen

Disco ja politihkka
Lindseth aj adná sáme æjvvalimsajijt ájnnasin, dagu nuorajorganisásjåvnåv Noereh, gånnå l iesj stivrraájras sæmmi båttå gå sæbrrá válgajda NSR:a åvdås. 

– Juska lav iesj gáptev adnám ja ávvudallam guovvamáno 6.biejvev, le giellabarggo ja politihkalasj berustibme mij uddni vaddá vejulasjvuodav åhtsåt ja åvdedit ietjam sáme identitiehtav. Diedáv ietjam vásádusáj baktu man ájnnasa lij æjvvalimsaje dagu Sáme Goahte, váj mij nuora bessap æjvvalit ja nannit ietjama identitiehtav sábmelattjan, javllá Lindseth.

Duodden giellabargos ja politihkalasj berustibmáj la Ida europavuojtte discodánsan. Lindseth gæhká barggat váj væráltvuojtten såjtij sjaddat. – Giella la politihkka la dagu dánssa: Jus galga adnet juolgijt jali gielav, de hæhttu duosstat rahtjat ja ij åvvå vuollánit!