Skrevet av: Vendla Katrin Nielsen, Viestarmera válggabijra

Tjåhkanimjådediddje,

Mån lav låhkåm rádediedádusáv berustimijn ja sidáv låggŋit sáme varresvuodaværmádagáv.

Mån guláv álu ságastallamijt jut mij vájllup varresvuodabarggijt sáme giella- ja kultuvrramáhtudagájn ja la álu gatjálvis gåktu galggap rekruttierit dajt, ja hæhttup virgealmodimij baktu sierra máhtudagáv åhtsåt. Ja dat la gal duohta, ja dajna hæhttup joarkket. Valla majt ep máhte vajálduhttet la jut vilá gávnnu edna máhtudahka sáme varresvuodabarggijn gudi li virgálattja suohkanavarresvuodadievnastusán ja varresvuodaásadusájn ålles rijkan.

Hábmera suohkanin lip guoradallam sámegielmáhtudagáv mij la suohkanin daj baktu gudi barggi varresvuodadievnastusán. Guoradallam vuoset jut miján la edna máhtudahka dievnastusán ja dáv máhtudagáv hálijdip organiserit vaj sjaddá ávkken ålles sáme álmmugij suohkanin ja julevsáme guovlon.

Dakkir organiserim sjaddá oasse nannimis dásseárvulasj varresvuodadievnastusájt sáme álmmugij ålles Sámen

Hábmera suohkan sihtá ásadit julevsáme varresvuodaværmádagáv aktan Helse Nord’ajn, Nordlánda skihppijviesujn, SANKSajn ja ietjá akterraj.Hábmera suohkan la oadtjum dårjav duola dagu Sámedikkes julevsáme varresvuodaværmádagá åvddåprosjæktaj ja mij lip gijttevattja gå lip oadtjum doarjjarudájt.

Prosjækta plánij julevsáme varresvuodaværmádagáv, hiebadahteduvvam julevsáme dilijda ja mij tjuovvo modellajt iemeálmmuk varresvuodaværmádagájs dagu Alaskan ja oarjjelsáme guovlon.

Julevsáme varresvuodaværmádak sjaddá duodden ájnas ressursa massta máhttep ávkástallat fágalasj máhtudagás ja rádevaddem sierratjiehppe- ja suohkanvarresvuodadievnastusán. Stratesjijjadokumentan “Sierratjiehppevarresvuoda dievnastus sáme álmmugij” ævtoduvvá ásadit varresvuodaværmádagáv gånnå varresvuodabargge máhtudagájn sáme gielan ja kultuvran, barggi værmádagán gænna la sierra åvdåsvásstádus sáme pasientajt huksat.

Dakkir organiserim sjaddá oasse nannimis dásseárvulasj varresvuodadievnastusájt sáme álmmugij ålles Sámen.