Guovdageainnu sámiid searvi

Sámi Klinihkka, dehálaš sámi dearvvašvuođabálvalus

Jurddašmat ahte don ovtta beaivve buohccát. Don leat rašes dilis ja dárbbahat veahki.

Don beasat dearvvašvuođa bálvalussii. Muhto, dearvvašvuođabargi gean deaivvat – ii huma du giela. Buoremus lágii mielde geahččalat čilget vieris gillii. Muhto, olmmoš gii du ovddabealde čuožžu ii ipmir du kultuvrralaš vuolggasaji ja dárbbuid. Ja don vásihat ahte olmmoš gii du galgá veahkehit, ii ipmir du, ja it oaččo dan veahki man dárbbahat.

Dát lea realitehta maid min sámi álbmot vásiha beare dávjá.

Mis lea otne Sámi Klinihkka, áidna sámi spesialistadearvvašvuođabálvalus. Mii lea hui dehálaš ja buorre fálaldat sápmelaččaide. Doppe leat dearvvašvuođabargit geain lea sámi giellagelbbolašvuohta ja kulturipmárdus. Ja sis lea erenomáš gelbbolašvuohta juste fal sámi dearvvašvuođa ja sámi pasieanttaid ektui.

Sámi klinihkka lea organiserejuvvon dásis gos sii eai leat sierra dearvvašvuođafitnodahkan. Sis ii leat dasto sierra bušeahtta ja stivra. Sii eai sáhte vuoruhit ja ovdánahttit sin doaimma iežaset dárbbuid mielde. Juoga mii hehtte Sámi klinihka ovdánit dárbbuiguin maid sii vuhttet beaivválaš barggus ja deaivvadeamis sámi pasieanttaiguin.

 

Otná Spesialistadearvvašvuođabálvalusa organiseren ii dasto vuhtiiváldde sámiid rivttiid álgoálbmogin, nugo iešmearridanvuoigatvuohta dearvvašvuođabálvalusaid plánemii, hábmemii ja organiseremii.

Dát čájeha dehálašvuođa dán áššis. Sámedikki dievasčoahkkin ferte dál muittuhit eiseválddiide sin geatnegahtton soahpamušaid ja geatnegasvuođaid. NSR bealis oaivvildit ahte lea hoahppu ahte Sámi klinihkka organiserejuvvo alit dásis, njuolga Davvi Dearvvašvuohta GDF vuollai, vai ožžot sierra stivrra ja bušeahta. Ja vai sáhttet ieža dahkat daid vuoruhemiid maid oidnet dárbbašlaččan, eaige dárbbat vuordit dohkkeheami eará dáža ásahusain.

 

Guhkit áigge mihttun lea ásahit sierra nationála sámi dearvvašvuođadoaimmahaga.

Muhto dát, lea vuosttaš lávkii vai Spesialistadearvvašvuođabálvalusa vuhtiiváldá sámiid rivttiid álgoálbmogin, nu go iešmearridanvuoigatvuođa dearvvašvuođabálvalusaid plánemii, hábmemii ja organiseremii.