Historjjálaš giellaguovddášlokten NSR:as

Govva: Inger Elin Utsi / Sámediggi

– Buot sámi giellaguovddážat miehtá Norgga ožžot vejolašvuođa bálkáhit ovtta liigevirggi guhtege. Dát dagaha hui stuora giellaloktema miehtá riikka, ja lea dehálaš oassi dan barggus maid mii dál dahkat njulget giellavahágiid maid dáruiduhttinpolitihkka lea dagahan, dadjá Sámediggepresideanta Silje Karine Muotka (NSR).

Buot 20 sámi giellaguovddážiidda lea 800 000 ruvnnu lassáneami jahkásaččat 2026 rájes, mii mearkkaša ahte ožžot 500 000 ruvnnu dál njukčamánus. Dat dahká ahte giellaguovddážat šaddet stargadat ja buorida vejolašvuođaid fállat giellaoahpahusa.

– Dát lea historjjálaš áŋgiruššan masa lea stuorra dárbu. Ollu giellaguovddážiid eaiggáduššet giellahálddašansuohkanat, ja mii oaivvildit dát lea stuorra juolludeapmi mii nanne sin giellabarggu, dadjá Maren Benedicte Nystad Storslett (NSR), gii lea sámediggeráđđi geas lea ovddasvástádus gielas.

Giellaguovddážiin leat guokte váldodoaimma. Dat lágidit giellakurssaid báikkálaččat, ja ráhkadit giellaarenaid gos sápmelaččat besset deaivvadit ja geavahit iežaset sámegielmáhtu.

– Giellaguovddážiin lea hui dehálaš rolla giellaovddideamis Sámis. Jus mii galgat lihkostuvvat oažžut eanet giellageavaheddjiid, de mii dárbbašit nanu giellaguovddážiid. Go daidda addojuvvo vejolašvuohta nannet kapasitehtaset, de nanusmuvvet oppalaččat ja sáhttet dahkat vel buoret barggu, dadjá Storslett.

Dasa lassin nannejuvvo ohcanvuđot ortnet gielladoaibmabijuide 1,2 miljovnna ruvnnuin, vai eanet suohkanat ja earát sáhttet ohcat doarjaga ásahit ođđa sámi giellaguovddážiid doppe gos dat odne váilot.

– Mii diehtit ahte máŋggaid guovlluin dárbbašuvvojit sámi deaivvadanbáikkit, ja dát lassáneapmi addá eanebuidda vejolašvuođa ohcat doarjaga ásahit giellaguovddážiid doppe gos dat dárbbašuvvojit eanemusat, loahpaha Storslett. 

Dáinna áŋgiruššamiin NSR olaha ovtta min deháleamos vuoruhemiin ja bargá Sámi giellaloktema nannemin miehttá riikka!