Teknologiija ja digitaliseren – ođđa vejolašvuođat Sápmái

Teknologalaš ovdáneamit mearkkašit ođđa vejolašvuođaid Sápmái. NSR háliida geavahit vejolašvuođaid maid dát ovdáneapmi buktá sihke sámi gielaid nannemii ja sámi kultuvrra ja ealáhusaid ovdánahttimii.

Kategori
NSR
Forfatter
NSR
Dato
19.08.2021
NSR

Teknologiija ja digitaliseren – ođđa vejolašvuođat Sápmái

– Sámi podcasttat, filmmat, ráiddut, spealut ja ođasmediat leat dehálaččat vai sámi gielat eai bázahala go teknologiija ovdána issoras leavttuin. Lea dárbbašlaš ahte sámegielaid lea álki geavahit, sihke mátketelefovnnain ja dihtoriiguin, nu ahte beassat sámegiela geavahit iežamet digitála árgabeaivvis, dadjá Elle Nystad, guhte lea sihke YouTube-buvttadeaddji ja NSR-evttohas Ávjovári válgabires.

Sámi podcasttat, filmmat, ráiddut, spealut ja ođasmediat leat dehálaččat vai sámi gielat eai bázahala go teknologiija ovdána issoras leavttuin.

YouTubes buvttada Elle sámi sisdoalu ja su kanálas gávdná earret eará ovtta video liidneriessuma birra. Maŋimuš jagiid de leat ain de ihttán ođđa sámi buvttadeaddjit internehttii, ja sámi speallanbiras lea maid sajáiduvvan.

– Digitála sámegielbirrasat mánáide ja nuoraide lea veahkkin oktasašvuođa ja identitehta huksemis. Mun álggahin Youtube-kánala justa fal go ieš váillahin eanet sámi mediasisdoalu, muitala Elle.

Ođđa ealáhusat

NSR háliida áimmahuššat ja loktet dan hutkáivuođa man gávdná sámi kultuvrras. Innovašuvdna ja bargosajiid ásaheapmi sihkkarastá ássama olles Sámis, ja lea dan láhkai mielde seailluheames sámi gielaid ja kultuvrra boahttevaš buolvvaide. Ferte vuoruhit suvdilis ealáhusaid ovdal goarideaddji ealáhusaid. NSR háliida áŋgiruššat nannosit ovdamearkka dihtii mátkeealáhusaid, kulturealáhusaid, biebmobuvttadeami ja suvdilis ođđahutkosiid ovdii.

Sámegiella digitála máilmmis

Sápmi lea viiddis ja gaskkat leat guhkit lullin davás ja oarjin nuorttas. Buorit digitála čovdosat sáhttet buktit bálvalusaid maiguin buot sápmelaččat sáhttet ávkkástallat, beroškeahttá gos ásset. Sámi spealut, girjjit, filmmat ja ráiddut leat dehálaččat sámi mánáide ja nuoraide. E-doavtterortnet SÁNAG`ii buvttášii buohkaide buoret sámi dearvvašvuođafálaldaga, ja digitála oahpponeavvut álkida sámi oahpaheddjiid beaivválaš bargguid. Berre maid vuoruhit loktet sámegielaid oidnosii, ja buot digitála čovdosiin almmolaš ásahusain ferte heivehit ja buvttadit sámegillii.

Mii fertet buvttadit eanet, ja buoret digitála reaidduid vai šattašii vel álkit oahppat sámegiela.

– Munnje lea e-skuvla leamaš dehálaš digitála vuogádat sámegiela oahppamii. Mii fertet buvttadit eanet, ja buoret digitála reaidduid vai šattašii vel álkit oahppat sámegiela. Mun jáhkán ahte mađi álkit lea sámegiela oahppat, dađi eanet olbmot oahpašedje, dadjá Anja Tonhaugen, NSR 3. evttohas Davveguovllu válgabiirres, ja dasa lassin doaimmaha bivttasmearkka MII LEAT.

Teknologiija ja digitaliseren buktá vejolašvuođaid Sápmái. NSR oaivvilda ahte Sámedikkis lea dehálaš bargu fuolahit ahte maiddái sámegielat ovdánit digitála ovdánemiin, ja ahte innovašuvdna ja ovdánahttin boahtá midjiide buohkaide buorrin.