Vuolgge oahpahallin!

Háliidat go diehtit eanet Sámedikki birra? Háliidat go oahppat eambo sámepolitihka birra? Ja háliidat go oahpásmuvvat NSR politihkalaš bargguiguin? Oza beassat oahpahallin NSRa sámediggejovkui!

Vuolgge oahpahallin!

Ortnega birra

Oahpahalli-ortnet lea johtui biddjon vai NSRa nuorra miellahtuide galget beassat oahppat eanet sámepolitihka, NSR ja Sámedikki birra. Oahpahallin beasat mielde Sámedikki lávdegotte- ja dievasčoahkkimiin Kárášjogas. Dát sisttisdoallá buot daid rabas čoahkkimiid Sámedikkis, NSRa joavkočoahkkimiid, semináraid mat lágiduvvojit dan oktavuođas, ja daid sosiála dilálašvuođaid mat vel gullet dasa. Oahpahallái gokčojuvvo mátki ja orrun ja vel honorára.

Mo vuolgit oahpahalliin

  • Buot NSR-miellahtut badjel 18 jagi sáhttet ohcat oahpahallin.
  • Čále ohcama mas muitalat veaháš iežat birra ja manne háliidat oahpahallin, ja lasit vel iežat CV. Sádde dán nsr@nsr.no ja merke maila Oahpahalli.

Lea NSR sámediggejoavku ja NSR nuoraidlávdegoddi main lea ovddasvástádus dán ortnegis.

Sádde šleađga-boastta aslak.heika@nsr.no dahje riŋge Áslagii 99373650 nummarii jus leat gažaldagat ortnega birra.

Njuolggadusat oahpahalli-ortnegii

  1. Oahpahalliortnega ulbmil lea ahte nuorra NSR-miellahtut besset oahpásmuvvat NSR politihkalaš doaimmain Sámedikkis, NSRa politihkain ja Sámedikkiin politihkalaš vuogádahkan. Dasa lassin galgá ortnet movttiidahttit nuorra NSR-miellahtuid áŋgiruššat sámepolitihkain.
  2. Berošteaddjit sáddejit ohcama oahpahallin beassat ohcama bokte mas namma, CV, ja motivašuvdnareive. Ohcan sáddejuvvo NSR čállingoddái.
  3. NSR Nuoraidlávdegoddi ja Parlamentáralaš Jođihangoddi válljejit ovttasráđiid oahpahalli maŋŋel go leat geahčadan buori áiggis ja maŋimusat ovtta mánu ovdal lávdegotte- ja dievasčoahkkimiid.
  4. Ohcci ferte leat deavdán 18 jagi árvvoštallojuvvot oahpahallin.
  5. Oahpahalli ja NSR čálliba oahpahalli-šiehtadusa, mas earret eará honorára šiehtadallojuvvo.
  6. NSR joavkočállis lea váldoovddasvástádus oahpahalle-ortnegis ja lea oahpahalli váldo gulahallanolmmoš ovdal, čoahkkimii áigge ja maŋŋel čoahkkimiid.
  7. Oahpahalli galgá:
    1. oahpásmuvvat NSRa ehtalaš njuolggadusain ovdal čoahkkimiid.
    2. ráhkkanit ja oahpásmuvvat áššiin mat meannuduvvojit Sámedikkis ja galget válljet ovtta ášši man čuvvot erenoamážit. Oahpahalli galgá čuovvut dan lávdegotti mas dát ášši meannuduvvo ja galgá media čuovvulit dainna áššiin.
    3. searvat joavkočoahkkimiidda, lávdegottečoahkkimiid ja dievasčoahkkimiid ja joavkočoahkkimiidda mat lágiduvvojit ovdal lávdegotte- ja dievasčoahkkimiid.
    4. geavahit sosiála mediaid NSR sámediggejoavkku bealis.
    5. maŋimusat mánu maŋŋel čoahkkimiid raporteret Sámediggejovkui ja Nuoraidlávdegoddái. Raporta galgá sisttisdoallat čilgehus doaimmain ja smiehttamušaid searvama ávkkálašvuođa ektui
  8. Čoahkkimiid áigge galgá Sámediggejoavku aktiivvalaččat inkluderet oahpahalli ja fuolahit ahte oahpahalli oažžu stuorra ávkki searvamis.
  9. Mátki ja orruma gokčá NSR.