Ođđa joavkoráđđeaddi ja čállingoddemielbargi

Aina Madelén Nordsletta Aslaksen (23) lea Kárášjogas ja Fanasgiettis eret, ja orru Oslovasse. Son lea dássážii leamaš NSR Nuorat organisašuvdnačállin. 

Aslaksen čohkká earret eará nuoraidovddasteaddjin Oslo Sámiid Searvvi (OSS) stivrras ja lea nubbinjođiheaddji Sámedikki Nuoraidpolitihkalaš Lávdegottis (SáNuL). Sus lea maid guhkes organisašuvdnavásihus eará luohttámušdoaimmain. 

– Mun lean birrasii bajásšaddan sámepolitihkalaš organisašuvdnaeallimin, ja lean áŋgiruššan servvodat- ja politihkalaš áššiidde nu guhká go oba muittán ge. Danin illudan sákka eanet ovttasbargat sámediggejoavkkuin, dadjá Aslaksen.

– Mii leat hui illosat go mii leat virgádan ođđa, čeahpes joavkoráđđeaddi NSR:ii! Leimmet oatnelanbotta binnáš balus go čeahpes Elle Mári virgáduvvoi ođđa bargui, muhto dat han manai bures. Dál mii sávvat Aina Madelenii bures boahtima, ja sávvat Elle Márii lihku ođđa hástalusaiguin, dadjá Beaska Niillas, NSR sámediggejoavkku parlamentáralaš jođiheaddji.

Aslaksen bargá earret eará riikkačoahkkima buvttademiin, mii lágiduvvo 2024 čavčča, lassin eará čállingoddedoaimmaide. 

– Lean hui ilus go Aina Madelén dál oažžu stuorát mearreáigásašvirggi min organisašuvnnas. Son bearráigeahččá ja sus lea buorre bajilgovva iešguđetlágan bargguid ja áššiid birra. Mun illudan joatkit ovttasbarggu suinna, dadjá Beatrice Iren Fløystad, NSR jođiheaddji. 

NSR váldočállingoddi lea Guovdageainnus, muhto Aslaksenis lea kántursadji Oslove Sámi viesus. Son šaddá bargat 50% ráđđeaddin ja čállin sámediggejoavkkus, ja 50% čállingotti mielbargin.

Oktavuođadieđut:

nsr@nsr.no

aina@nsr.no