Áillohaš musihkabálkkašupmi 2024!

Áillohaš musihkabálkkašupmi 2024!

Beassášlávvordaga, Sámi Grand Prix oktavuođas, geigejuvvui Áillohaš musihkabálkkašupmi 2024. Dán jagi vuoiti lei Ella Marie Hætta Isaksen.

Elle Marie lei vuosttaš geardde Sámi Beassášmárkaniid lávddi alde 2016 go vuittii Sámi Grand Prix lávlun oasi. 2017 lei su vuosttaš konsearta joavkkuin ISÁK, ja dan rájes lea olahan guhkás.

Luohti lea hui guovddážis su musihkas, sihke árbevirolaš luohti ja luohti ođđaáigásaš musihkkahámis. Son lea dainna lágiin lokten sámi musihka áibbas ođđa dássái, ja olahan guldaleddjiid maiddái riikkaviidosaččat.

Ella Maries leat olu attáldagat, ja seamma ládje go Áillohaš hálddaša máŋga dáiddasuorggi. Lassin musihkain bargat lea maid earret eará čállán girjji ja neaktán filmmain.

Sihke dáidaga ja iežas sajádaga almmolašvuođas ja nanu jiena bokte, lea son ovddidan sámi musihka ja bealuštan sámiid kultuvrra, rivttiid ja maiddái olmmošvuoigatvuođaid. Su čielga áŋgiruššan movttiidahttá earáid.

– Dá lea stuorámus gudni maid goasse lean ožžon iežan karriearas, dadjá Ella Marie NRK Sápmai.

Áillohaš musihkkabálkkašumi ásahii Guovdageainnu Sámiid searvi ja Guovdageainnu suohkan 1993:s gudnin Áillohažžii su 50 jagi beaivái. Ja juhkkojuvvo jahkásaččat Sámi Grand Prix oktavuođas soapmásii gii lea bargan juoigama, luođi ja sámi musihka buorrin Áillohačča vuoiŋŋas.

Áillohaš musihkkabálkkašumi vuoiti oažžu NOK 20 000, guokte vahkku orruma Lásságámmis, Áillohačča geassebáikkis, ja duoji man Ovlla Gaup lea duddjon.

Guovdageainnu sámiid searvi sávva hui olu lihkku dán jagi vuoitái, Ella Marie Hætta Isaksenii!

Foto: Mads Suhr Pettersen / Sámi musihkkafestivála