Ávjovári válgabiire

• NSR:a evttohasat Ávjováris
• Válgamagasiidna

• Dušše sii geat eai leat ruovttugielddas válgabeaivvi fertejit jienastit ovddalgihtii. (gaskal borg. 10. b.- čakč. 10.b.)

NSR áigu Ávjovári válgabires bargat:

• Nannet sámi giellaguovddážiid, ja erenoamážit fuomášahttit mánáid ja nuoraid vuosttašgielatoahpahusa, ja sihkkarastit ahte sámi mánáid vuoigatvuohta sámegielat mánáidgárdefálaldahkii nannejuvvojit lága bokte. 
• Sámi boarrásat geat leat ásahusain ja geain ruovttubálvalusat fertejit beassat áŋgirit searvat sámi kultureallimii. Ferte ovdánahttit buriid doaibmabijuid mat nannejit sámi mánáid, nuoraid ja boarrásiid psyhkalaš dearvvašvuođa. 
• Ahte juolludeamit sámi ja árktalaš eanadollui juolluduvvo stádabušeahta bokte ja ahte meieriijat sámi guovlluin bisuhuvvojit.
• Ahte Sámediggi váldá badjelasas boazodoallohálddašeami, čuovvula boazodoallolávdegotti árvalusa ja sihkkarastá boazodollui eanasuodjaleami sisabahkkemiid vuostá.
• Sihkkarastit einnostahtti ruhtadeami Mearrasiidii ja Mearrasámi duodjedállui Billávuonas ja ásahit fanassuodjalanguovddáža Porsáŋgui. 
• Nannet árbevirolaš máhtu luossabivdohálddašeamis ja sirdit dán gelbbolašvuođa boahttevaš buolvvaide, ja dássedis predáhtorbivddu.

• Ahte Riddoguolástuslávdegotti árvalus duohtandahkkojuvvo ja ahte oktasaš ja historjjálaš vuoigatvuođat mearraguolásteapmái nannejuvvo lága bokte.
• Nannet dáloniid vuoigatvuođaid meahcásteapmái, dás maid mohtorjohtolaga vejolašvuođa mehciin, ja sihkkarastit buot bivddu ja ahte giđđalodden šaddá bistevaš ortnegiin Guovdageainnus. 
• Rievdadit boraspirepolitihka sihkkarastin dihtii eamiálbmotvuoigatvuođaid ja ahte ávnnaslaš kulturvuođus lea duohta ovdasadji Bern-konvenšuvnna ovddabeale ja ahte dat doahttala ILO-soahpamuš 169.
• Doarjut Mázii dáiddárviesu ja Álttá / Guovdageainnu-áššái duođaštanguovddáža, ja bargat oažžut girdihámmana Guovdageidnui. 
• Nannet kulturarenaid ja kreatiivva ealáhusaid ovdánahttima sihke fágalaččat ja ekonomalaččat, nu mo earret eará Dáiddadállu, Internašunála Sámi Filbmainstituhtta, Beassášmárkanat, Beaskán Luossa Rock, Sámi Grand Prix, Sámi Dáiddaguovddáš, Beaivváš Sámi Našunalteater, Sámi museat ja sámi dáiddamusea. 
• Ahte láhččojuvvo dilli buriid báikkálaš proseassaide mat gusket Finnmárkokommišuvnna bargui guorahallat ja dohkkehit sámiid vuoigatvuođaid eatnamiidda ja čáziide, ja ahte huksejuvvojit  hálddašanvuogádagat mas oktasaš ja oktagaslaš vuoigatvuođat dohkkehuvvojit. Kárášjoga álbmot dohkkehuvvo Kárášjoga eatnamiid oamasteaddjin ja hálddašeaddjin.