Porsáŋgu lea okta Sámedikki bušeahttavuoitiin

Njukčamánus galgá Sámediggi juohkit 50 miljovnna lasseruđa. Go Sámediggeráđđi vuossárgga bukte ovdán sin bušeahttaárvalusa, lea Poršaŋgu bušeahttavuoitiid searvvis.

Porsáŋgu gielda hálddaša ovtta sámi giellaguovddáža; Sámi giella ja kulturguovddáš. Sii ožžot dál vejolašvuođa nannet doaimmaideaset liigevirggiin, go sidjiide juolluduvvo 500.000 ruvnnu lasi.

– Lea issoras somá juohkit dán ođđasa. Lea sáhka historjjálaš áŋgiruššamis giellabargguide miehtá sámi, maiddái Porsáŋggus. Min mielas dát lea hui deaŧalaš vuohki nannet daid doaimmaid maid Porsáŋggu gielda jođiha go lea sámegielaid halddašanguovlu, ja maiddái sin báikkálaš doaimmaid, muitala Maren Benedicte Nystad Storslett (NSR), gii lea sámediggeráđđi geas lea ovddasvástádus gielas

Nystad Storslett lea válljejuvvon sámediggeáirrasin Ávjovári válgabiires. Dán áigodagas lea áŋgiruššan dan ovddas ahte Porsáŋgu galgá vuoruhuvvot go bušeahttat meannuduvvet. 

Sus lea vel nubbi illosáhka Porsáŋgui:

– Nubbi ođas lea ahte Mearrasiida Billávuonas oažžu 300.000 ruvnnu lasi nannendihte sin bargguid mearrasámi kultuvrra ja sámi fanasárbevieruid ovddas. Mearrasiidii lea jo juolluduvvon 500.000 ruvdnosaš lassáneapmi dán áigodagas. NSR oaivvilda ahte lea deaŧalaš nannet báikkálaš ásahusaid mat ovddidit sámi kultuvrra ja árbevieruid, nu mo Mearrasiida dahká Porsáŋggus, loahpaha Nystad Storslett.