Sámedikki dievasčoahkkin juovlamánu 02.-05. beivviid 2025

Dás beasat oahppásmuvvat min sámediggejoavkkuin

Sak 051/25 Ođđa áššiid dieđiheapmi

Evttohus 5 – Sámi mánáidgárdi Moskaluovttas

Áirras Sandra Márjá West, Gáiseguovlu válgabiire

Moskaluokta lea mearrasámi gilli Romssa suohkanis. Moskaluovtta ovddidansearvi (Lakselvbukt utviklingslag) lea bivdán Romssa suohkana dahkat Moskaluovtta mánáidgárddi ja skuvlla sámegiel mánáidgárdin ja skuvlan. NSR doarju Moskaluovtta ovddidansearvvi evttohusa, ja oaivvilda ahte sámi mánáidgárddi ja skuvlla áŋgiruššan lea dehálaš go galgá sámegiela ja sámi kultuvrra ealáskahttit ja nannet guovllus.

NSR bivdá sámediggeráđi čuovvulit dán vuolggaheami Romssa suohkaniin, mii eaiggáduššá mánáidgárddi ja skuvlla. Skuvllas ja mánáidgárddis lea buorre ovttasbargu Gáisi giellaguovddážiin, ja dáinna bargguin sáhttá ain viidáseappot bargat. NSR mielas lea buorre ahte Moskavuona, mii lea dehálaš mearrasámi guovlu, mánáid oahpahus sámegielas ja kultuvrras nannejuvvo.

Evttohus 9 Boazodoalu hástalusat lullin Norlánddas

Áirras Katri Kitti, Lulli-Sámi válgabiire

Voengel Njaarke orohagas leat 28 bohcco vuojáhallan jámas golggotmánu 17. beaivvi rájes, E6-geainnus Trofors lulábealde. Ovdalaš jagiid leat vuojáhallan moadde bohcco, muhto dál dat lea lassánan olles 1766 proseanttain. Orohatjođiheaddji lea gohčodan “varrageaidnun” dan geainnu, muhto Stáhta geaidnodoaimmahat ii leat maidege konkrehtalaččat evttohan. Geaidnodoaimmahat ja Svevia baicce sivahallet nubbi nuppi.

Go bohccot vuojáhallet, de dat čuohcá sihke boazodollui ja johtolatsihkarvuhtii. Boazodoalli manaha dietnasa, muhto dás han lea maid sáhká kultuvrras, árbevierus ja ovddasvástádusdovddus. Go bohccot vuojáhallet, de dat čuohcá maid psyhkalaččat.

Orohat lea evttohan gaskaboddasaččat vuolidit leahtu, ihkku lágidit ráidovuodjima, váruhusgalbbaid cegget main leat šleađgačuovggat, galbbaid cegget ja vel buoridit buhtadusortnegiid.

Vaikko leat čielga dárbbut ja vaikko leat konkrehta evttohusat, de geaidnodoaimmahat ii leat gávdnan makkárge čovdosiid. Dál galggašii vajot ja dakkaviđe doaimmaid bidjat johtui ja dakko bokte seastit sihke elliid ja johtolaga. Joavku bivdá Sámediggeráđi bargagoahtit geaidnodoaimmahagain ovttas oažžun dihte johtui doaimmaid mat unnidit bohccojápmimiid ja bissehit gillámušaid geaidnoguorain lullin Nordlánddas.

Evttohus 10 – Suodjal Finnmárkku vuonaid riddoguolásteami

Áirras Aslak Heika Hætta Bjørn, Lulli-Norgga válgabiire

Dán čavčča leat stuora mearraguolástanfatnasat beassan bivdit vuotnalinjjá siskkobealde Davvi-Romssas ja Nuorta-Finnmárkkus. Go stuora fatnasat bivdet snoranuhtiiguin vuonain, de dat sakka čuohcá vuotnaássiid eallimiidda ja mearrasámi riddobivdui.

Sámediggi bivdá sámediggeráđi sihkkarastit ahte konsulterejuvvo vuotnaguolástuslávdegottiin sierralohpeáššiin mat gusket guolásteapmái vuotnalinjjá siskkobealde, ja maiddái bargat bissehit bivddu snoranuhtiin ja eará aktiiva bivdosiiguin vuotnalinjjá siskkobealde.

Sámedikki dievasčoahkkin juovlamánu 02.-05. beivviid 2025

Kategori

Forfatter

Dato