NSR-listu Gáisi válgabiirres: Hárjánan, čeahpes, máŋggabealat ja nuorra

– Mun lean hui duhtavaš dáinna listtuin. Mii leat gávdnan sihke hárjánan olbmuid, gelbbolašvuođa, máŋggabealatvuođa ja maid ođđa buolvva mearrasámi nuoraid mat servet, muitala válgastivrra jođiheaddji, Runar Myrnes Balto.

Njunuševttohas Sandra Márjá West leamaš golbma áigodaga jo Sámedikkis, 2013 rájes. Son lea oahppan garra- ja litnaduojár ja maiddái gollerávdi, ja sus lea vásáhus kulturbargin, earret eará Riddu Riđđu jođiheaddjin.

– Mearrasápmelažžan mun áŋgirušan mearrasámi identitehta ja kultuvrra nannet ja ealáskahttit. Mii oaidnit man nannosit sámevuohta lea badjánan Gáisi válgabiirres, ja dán háliidan veahkkin nannet boahttevaš jagiid. Mii háliidit earret eará ásahit eanet fálaldagaid ja čoahkkananbáikkiid iežamet biirres, doppe gos eai vel leat, dadjá Sandra Márjá West.

Gáivuonlaš Henrik Olsen lea čeahpes politihkkár mas nanu hárjáneapmi. Dál son geahččala beassat Sámediggeáirrasin njealját áigodahkii. Son berošta erenoamážit guolástanvuoigatvuođain ja mearrasámi biebmovuogádagain. Goalmmát sajis listus lea 22 jahkásaš Amalie Hansen Kristiansen Raste eret Muotkis Sálliris. Ovttas 20 jahkásaččain Signe Birkeland Johnsen Olmmáivákkis eret, guhte lea viđát sajis, ovddasteaba dál ođđa buolvva mearrasámi nuoraid geat dál dáhttot leat mielde sámepolitihka hábmemis.

– Dát nissonolbmot leaba mearrasámi nuorat geat máhcahit sámi identitehta, ja geaid politihkalaš beroštupmi boktojuvvui Fovse-ákšuvnnaid bokte. Sudnos lea buolli dáhttu hukset dorvvolašvuođa mearrasámi nuoraide, erenoamážit dáruiduvvan guovlluin, seammás go čájehit solidaritehta eará sámiin. De mis orro čuvges boahtteáigi, muitala válgastivrra jođiheaddji Myrnes Balto.

Njealját sajis lea ges dovddus sámi politihkkár Beaska Niillas, guhte lea NSRa nubbijođiheaddji ja parlamentáralaš jođiheaddji Sámediggejoavkkus. NSR Gáisis lea hui duhtavaš go dát čeahpes ja čielga sámi politihkkár lea min listtus dáidda válggaide.

Emil Karlsen lea listtu maŋimuš sajis listus. – NSR gal lea hirbmat ilus go dát ofelasti sámi artista ja neavttár, Emil Kárlsen Čavkusis Omasvuonas háliidii min listui. Son lea áigeguovdil sihke skearruin ja Disneyain dán jagi, ja son čájeha dáinna searvamiin guđe guvlui son háliida Sámedikki bálgáid boahttevaš jagiid, loahpaha Myrnes Balto.

På bildet fra venstre: Signe Birkeland Johnsen, Beaska Niillas, Amalie Hansen Kristiansen, Henrik Olsen, Sandra Márjá West, Vidar Andersen og Leif Arild Tore Pedersen

Her er NSRs liste for Gáisi valgkrets:

1. Sandra Márjá West, 1990, Tromsø
2. Henrik Olsen, 1970, Kåfjord
3. Amalie Hansen Kristiansen Raste, 2003, Tromsø
4. Beaska Niillas, 1982, Tromsø
5. Signe Birkeland Johnsen, 2005, Kåfjord
6. Vidar Andersen, 1978, Tromsø
7. Camilla Brattland, 1980, Tromsø
8. Leif Arild Tore Pedersen, 1954, Senja
9. Sara Katrine Aleksandersen, 2001, Lyngen
10. Rolf Johansen, 1954, Lyngen
11. Karen Anette Anti, 1972, Målselv
12. Emil Ráste Nikolavu Karlsen, 1997, Storfjord