Juovladearvvuođat NSR-jođiheaddjiin

Go gárra biekkat bossot sámi áššiid birra, de dárbbaša Sápmi nana ja čohkkejeaddji organisašuvnna mii čielgasit bealušta sámi beroštumiid. Dát organisašuvdna lea NSR, ja miellahttun searvvat don dan erenomáš buori eaktodáhtolaš bargui mas mii buohkat ovddidat ja suddjet sámi gielaid, kultuvrra, ealáhusaid ja identitehta.

Sámiid searvvit, mat dahket NSR, doaimmahit eaktodáhtolašbarggu beaktilit. Jagis 2019 leat ovdamearkka dihte sihke Bergen ja Romssa sámiid searvvit ávvudan 50 jagi doaimma. Bergenis ávvudedje kulturdoaluiguin olles gávpogis. Kárášjoga sámiid searvvi gáibádus Finnmárkokommišuvdnii oaččui doarjaga ahte Kárášjoga álbmot galgá kollektiivvalaččat eaiggádit FeFo-eatnamiid gielddas.

Báikkálaš áššiid vuoitin ja positiivvalaš ovdánahttin ii livčče meinnestuvvan min sámiid servviid rahčamušaid haga. Sámi deaivvadanbáikkiid ráhkadeapmi. Gielddat servet sámegielaid hálddašanguvlui NSR-serviid áŋgiruššamii geažil omd. Dielddanuorri gielda dahká dan Iinná ja biras sámiid searvvi 20 jagi rahčamušaid dihtii. Ja Álttá sámiid searvvi máŋga jagi bargu ges lea dahkan ovttasbargošiehtadusa gaskal Álttá gieldda ja Sámedikki vejolažžan.

2019 leat mii ožžon guokte ođđa báikkálaš searvvi. Bures boahtin Tråanten dajven saemien siebrie Troanddimis, mii nanusmáhttá sámi fálaldagaid gávpogis, ja bures boahtin Láhppi sámiid searvái mii lea mielde mearrasámi ealáskahttimis Láhpis Oarje-Finnmárkkus. Goappaš searvvit jotket rámis NSR- árbevieru áŋgiruššamiin.

Ráhkis NSR-miellahttu, min barggus Sámedikkis leat mii čađahan ollu mii mas lea stuorra mearkkašupmi boahtteáigái. Erenomážit giella ja skuvla áššiiguin, dán buori giellajagis. Ođđa oahppoplánat, ođđa resurssat oahpponeavvosuorgái, oččodit eambo sámegieloahpaheddjiid, ja ođđa sámi girjjálašvuođa vuoruheapmi mearkkaša ollu sihke mánáide ja nuoraide ja gielaid ovdánahttimii boahttevaš jagiid.

2020 bargat mii gáibideaddji áššiguin nugo Nussir, bieggafápmoplánaiguin, konsultašuvdnalahka ja sámi vuoigatvuođakártemiin, ja mii ráhkkanit 2021 válggaide. Mii leat okta unna organisašuvdna smávva ruđalaš valljodagain, muhto mii nákcet ollu olahit máŋgga dásis.

Ollu giitu juohkehažžii 2019 áŋgiruššama ovddas! Vuoiŋŋas fal dáid juovllaid ja čohkke fámuid! Buorit juovllat ja buorre ođđajahki buohkaide!

Juovladearvuođaiguin Runar Myrnes Baltos (jođiheaddji), Saia Stuengas (1. nubbinjođiheaddji), Vidar Andersenis (2. nubbinjođiheaddji)