Giella- ja kulturáŋgiruššamat Guovdageainnus ja Kárášjogas 

Go sámediggeráđđi vuossárgga ovddida árvalusa juolludit dan 50 miljovnna ruvnnu mat lasihuvvojedje stáhtabušehttii ovdal juovllaid, de leat maiddái Guovdageainnus ja Kárášjogas bušeahtavuoitit.

Maren Benedicte Nystad Storslett (NSR), sámediggeráđđi geas lea ovddasvástádus gielas ja oahpahusas ja gii lea válljejuvvon Ávjovári válgabiires, oaivvilda ahte sus lea dehálaš ođas buohkaide geat beroštit sámegielas:

– Dál lea historjjálaš giellalokten Sámedikki bušeahtas, go mii juolludit buot giellaguovddážiidda lasi 500.000 ruvnnu. Dát mearkkaša ahte giellaguovddážat Giellagiisá Guovdageainnus ja Kárenaš Kárášjogas ožžot vejolašvuođa viiddidit doaimmaideaset. Dát dagaha ahte giellabarggut suohkaniin nanusmuvvet, muitala báikkálaš sámediggeráđđi.

Dasa lassin oažžu RiddoDuottarMuseat, masa Kárášjoga ja Guovdageainnu museat gullet, oktiibuot 3,5 miljovnna ruvnno lassáneami.

– Dát lea lasiheapmi mii galgá váikkuhit ahte fárren ođđa museasajiide Kárášjogas manašii bures, seammás go dat nannešii musea fágalaš resurssaid, muitala Mathis Nilsen Eira, Kárášjoga NSR-áirras ja Sámedikki kultur- ja ealáhuslávdegotti jođiheaddji.

Beaivváš Sámi Našunálateáhter oažžu 1,5 miljovnna ruvnno lassin.

– Vuosttaš jahkebealis go ođđa visti huksejuvvui, de leat juo lágiduvvon ollu fiinna čájálmasat ja doalut. Midjiide lea deaŧalaš sihkkarastit ahte Beaivváš ožžot daid goluid mat gullet ođđa vistái gokčojuvvon. Dát lassáneapmi váikkuha earret eará dasa ahte sii dál sáhttet oastit rusttegiid ja dávviriid ođđa bivttasvuorkái, loahpaha Sámediggeráđđi Nystad Storslett.

Dasa lassin oažžu Internašunála Sámi Filbmainstituhtta 250 000 ru ja Duodjeinstituhtta 541 000 ru, ja sámi lágádusat Davvi Girji, ČáliidLágadus, DAT, Iđut ja ABC-Company E-skuvla oktiibuot 1,25 mill. ru. lasáhusa. Mot NSR evttoha juohkit visot daid 50 miljovvna ruvnnu sáhtát lohkat dás.