Vuosttaš dievasčoahkkin

Sámediggi dievasčoahkkin 02.-05.12.2025

Dás gávnnat olles áššelistu.

NSR Ávjovári ovddastedje Elle Rávdná Näkkäläjärvi, Nils Mikkel Somby, Andreas Vangseng Becken (oasi vahkkus) ja Nils Johan Nango (oasi vahkkus). Maren Benedicte Nystad Storslett oassalastii sámediggeráđi bealis.

Mannan vahkku meannuduvvui earret eará Sámedikki bušeahtta 2026, valáštallanšiehtadus, vuoruheamit sámedikki stipeanda alit oahpuide, cealkámuš boazodoallošiehtadussii ja eanandoallošiehtadallan.

Bušeahtta 2026

Sámedikki bušeahtas 2026 lea NSR ovttas ovttasbargojoavkkuiguin vuoruhan gielladoaimmaid, kulturdoaimmaid, ealáhusaid ja ohcanvuđot doarjagiidda lasáhusa.

Kárenaš sámi giella- ja kulturguovddáš Kárášjogas, Giellagiisá giellaguovddáš Guovdageainnus ja Sámi giella- ja kulturguovddáš Porsáŋggus ožžot 800 000 ru lasáhusa guhtege.

– Dáinna bušeahtain mii nannet giellaguovddážiid miehta Sámi. NSR lea maid lasihan juolludemiid olu dehálaš sámi ásahusaide. Dát leat ásahusat mat beaivválaččat barget sámegielain, -kultuvrrain ja -árbevieruiguin, leat guovddážis servodatovdánahttimis ja leat dasa lassin dehálaš bargosajit Sámis.

Ásahusat nugo Beaivváš našunála teáhter, RiddoDuottarMuseat, Dáiddadállu, Duottar Studio, Sámi filbmainstituhtta, Mearrasiida, Sjøsamisk Tun, Duodjeinstituhtta, Sámi dáiddaguovddáš, Beassášfestivála Guovdageainnus ja Kárášjogas, Beskán Luossa Rock, lágádusat ja Protect Sápmi ožžot doarjaga Sámedikkis. Máze Gilisearvi oažžu maid doarjaga bargat ovdaprošeavttain ásahit dokumeanttašuvdnaguovddáža – Golle Máze.

– Mii leat maid NSR bealis lasáihan juolludeami doarjjaortnegiidda go mii oaidnit ahte lea stuora beroštupmi ohccát doarjaga Sámedikkis. Sámediggi lea maid álggahan prošeavtta sámi biepmobuvttadeapmi ekui.

– Dá lea dehálaš doaibmá, mii sávvámis maid buktá beroštumi Ávjováris.

Sámedikki stipeanddat

Sámediggi lea maid vuoruhan guđe oahpuin sáhtát ohccát sámedikkis stipeanddaid dán áigodagas. NSR vuoruhan áin oahpaheaddji- ja mánáidgárddeoahpaheaddjeoahpuid, ja lea maid lasihan sámi buohccidivššár- ja dulkaoahpu. Dasa lassin sáhtát oažžut stipeandda jus logat sámegiela.

Dás gávnnat eambbo dieđuid Sámedikki stipeanddaid birra.

Valáštallanšiehtadus

Valáštallanšiehtadusa bokte Sámediggi ja SVL ovddidit ja digaštallat oppalaš valáštallanpolitihkalaš
doaimmaid ja hástalusaid. Mihttomearri lea ovddidit buori ja šláddjás sámi valáštallama, ja láhččit dili erenoamážit sámi mánáide ja nuoraide ovddidit valáštallanmovtta iežaset sámi identitehta vuođul.

NSR ovddidii mearkkašumi áššái gos čujuheimmet ahte maiddái valáštallansuorggit olggobealde SVLa otná doaimmaid berrejit oažžut doarjaga. Valáštallanarenat nannejit identitehtadovddu ja váikkuhit positiivvalaččat psyhkalaš- ja rumašlaš dearvvašvuhtii. Sámis lea earret eará e-valáštallan ja mohtorvaláštallan dehálaš, lassin daidda valáštallan surggiide maid SVL organisere.