Norgga Sámiid Riikkasearvi (NSR) nanne sámi giela ja kultuvrra nuortaguovllu válgabiires 2025 bušeahttaevttohusas. Deanu ja Unjárgga gielddaid giellaguovddážat ožžot 800.000 ruvnnu lassin jahkásaččat, ja Deanu ja Várjjaga museasiida oažžu oktiibuot 2,9 miljovnna ruvnnu lasáhusa earret eará ođđa Saviomusea plánemii ja nuortalaš kultuvrra ja sámi fanasárbevieruid nannemii.
NSR nanne giellaguovddážiid ja kulturfálaldagaid Nuorta-Finnmárkkus
Kategori
Deatnogátte sámiid searviDato
11.02.2025
Deatnogátte sámiid searvi
NSR nanne giellaguovddážiid ja kulturfálaldagaid Nuorta-Finnmárkkus
Sámediggi galgá juohkit 50 miljovnna ruvnno njukčamánus. Sámediggeráđi mearrádusárvalusas leat dehálaš áŋgiruššamat nuortaguovllu válgabiirres.
– Lea illudahtti muitalit ahte mii dál áŋgiruššat sihke Deanu ja Unjárgga gielddaid giellaguovddážiiguin. Goappašagat oažžuba vejolašvuođa virgádit vel ovtta olbmo dehálaš giellabargui, 800.000 ruvnnu lassin jahkásaččat. Dál 2025:s ožžot 500.000 ruvnnu njukčamánus, dadjá Sámediggepresideanta Silje Karine Muotka.
Maiddái sámi museat nuortaguovllus ožžot mearkkašahtti lasáhusa, oktiibuot 2 miljovnna ruvnno lasáhusa Deanu ja Várjjaga museasiidii. Dát boahtá lassin 900.000 ruvdnui mii lea juo juolluduvvon siidii 2025-bušeahtas.
– Museasiidda oažžu 2 miljovnna ođđa Saviomusea plánemii ja nuortalaš kultuvrra ja sámi fanasárbevieruid nannemii, dadjá sámediggepresideanta Muotka.
Muotka lea ieš Unjárggas eret ja sus lea maid gullevašvuohta Girkonjárgii, go doppe lea maid bajásšaddan.
– Munnje lea persovnnalaččat hui illudahtti beassat doarjut buot dan buori barggu mii bargojuvvo iežan ruovttuguovlluin. Ja ovdal go dát áigodat nohká, de sávan beassat juolludit maiddái mátta-Várjjat giellaguovddážii doarjaga, ja dađistaga maid sámi deaivvadanbáikái Girkonjárgii, loahpaha Muotka.