NSR ovdána 3,1% ja lea stuorámus bellodat!

Ođđa oaiviliskkadeamis maid Norstat lea čađahan NRK Sámi ovddas, boahtá ovdán ahte NSR mihtiduvvo 36,4 % ja lea dál stuorámus bellodat. Nordkalottfolket, mii lei stuorámus bellodat golggotmánu oaiviliskkadeamis, mihtiduvvo dál 34,9 %. Dát čájeha ahte sámi servvodat manná dál hui dássedis ja gelddolaš válggaid guvlui.

– Mii leat hui giitevaččat go sámi servodagas lea stáđis doarjja NSR:a politihkkii. Mun jáhkán válljejeaddjit háliidit Sámedikki mii ii vuollán stáhta vuostá, ovdamearkkadihte Muolkkuid-áššis ja riddoolbmuid vuoigatvuohta oamastit guliid. Sii háliidit Sámedikki mii čuolaha sámi vuoigatvuođaid bealis, ja sii oidnet ahte NSR dat fállá sidjiide dan, dadjá Sámediggepresideanta Silje Karine Muotka (NSR)

Vaikko NSR lea hui duhtavaš go leat fas stuorámus bellodat, de eat leat gal jurddašan vuoiŋŋastit válggaid rádjai. Mii áigut áŋgiruššat válggaid rádjái, ja áigut čájehit jienasteddjiide ahte sii gullojit.

– Lea ain guhkká válggaide, ja mii fertet áŋgiruššat vuoi bisuhit luohttámuša. Mii áigut deaivvadit ja ságastallat jienasteddjiiguin, guldalit sin ja duođaštit ahte midjiide sáhttá luohttit. Mii mannat válggaide čielga plánaiguin álggahit ođđa fálaldagaid dáruiduvvon guovlluide ja gávpogiidda, ja ođasmahttojuvvon plánain mo galgat oažžut olbmuid fárret ruovttoluotta sámi gilážiidda, muitala Muotka.

Njukčamánus nomineret NSR listtuid buot válgabiriin, ja organisašuvdna bargá árjjalaččat ahte báikkálaččat cegget buriid ja girjás listtuid.

– NSR givrodat lea ahte mii ovddastit olles sámi álbmoga. Min miellahtuin ja politihkkáriin lea girjás sámi duogáš, ja dat galgá oidnot min listtuin. Mii sihkkarastit ahte don galggat gullot, beroškeahttá gos orut, muitala NSR jođiheaddji Beatrice Iren Fløystad.