Eat goassige vuollán Riehpovuonain

Birgenvuođđu áitojuvvo

-Ii šatta ruvke nu guhká go mii leat dáppe, dadjá Beaska Niillas.

Plánejuvvon veaikeruvke Riehpovuonas Hámmárfeastta suohkanis leamaš guovddáš ášši Sámis jo moanat jagiid. Ruvkefitnodat Nussir ASA dáhttu luoitit badjel 30 miljovnna váralaš ruvkebázahusaid Riehpovutnii ja ruvke borašii eatnamiid boazodoalus mii lea jo gáržžohallan.

Nussir-ruvke duolmmašii sihke boazodoalu, mearrasámi kultuvrra ja eallima mearas

– Lea sáhka luonddubilidemiin ja ahte sámiid birgenvuođđu áitojuvvo. Nussir-ruvke duolmmašii sihke boazodoalu, mearrasámi kultuvrra ja eallima mearas, dadjá Beaska Niillas, guhte lea Norgga Sámiid Riikkasearvvi njunuševttohas Nuortaguovllu válgabires.

Moaitit ruvkemearrádusa Nussir-áššis

Bissut válggaid radjái

Beaska Niillas lea maid dovddus das ahte láve mannat báikki ala dáistalit, ja mihcamáraid lei mielde ceggemin leairra Márgohppái Riehpovuongáttis.

– Mii váldit njoammudili duođas de eat mii luoitte nu olu olbmuid báikki ala dál vuos. Muhto mis lea dál sajis buorre vuogádat mii sáhttá fuolahit olu olbmuid, dadjá Beaska.

Lea Redd Repparfjorden geat leat ceggen leairra ja geat organiserejit vuostálastima.

Eat sáhte dohkkehit luonddu ja sámiid vuoigatvuođaid oaffaruššojuvvot ruvkkiid ja stuorrakapitálii

– Mii bissut dás guittot válggaid rádjai. Mii háliidat čájehit sihke stuoradigge- ja sámediggepolitihkkáriidda mat servet válggaide ahte Nussir-áššiin eat leat vel vuollánan – ja ahte eat agibeaivvis sáhte dohkkehit luonddu ja sámiid vuoigatvuođaid oaffaruššojuvvot ruvkkiid ja stuorrakapitálii, dadjá Beaska Niillas.

Váiddii ruvkefitnodaga

Nils Mikkelsen Utsi, Fiettar-orohaga jođiheaddji, váiddii duorastaga Nussir ASA politiijaide. Nussir-jođiheaddji Øystein Rushfelt oaččui kopiija váidagis.

– Orohat lea váidán fitnodaga go mii oaivvildat dat leat álggahan rogganbargguid vaikko eai leat buot dárbbašlaš lobit sajis, dadjá Utsi.

Govven: Luonddu ja Nuorat / Eira Haugbro.

Konsešuvdna lea eahpegustojeaddji

Orohat lea maid dieđihan ahte sii fargga sáddejit proseassaalbmadeami ja dolvot ášši diggái.

– Midjiide gal livččii dát ruvkeásaheapmi sáhttit mearkkašit ahte máŋggat bearrašat duvdojuvvojit eret boazodoalus. Mii oaivvildit ahte konsešuvdna lea eahpegustojeaddji, ja danne mii doalvut dan diggái, muitala Utsi, guhte lea maid sámediggeáirras NSR ovddas.

NSR ávžžuha doarjut ruhtačoaggima

Jus ii sáhte Riehppovutnii vuolgit, de lea vejolaš veahkehit goitge. Darbbašuvvo politihkalaš vuortnuheapmi ja ruhtadoarjja. Redd Repparfjorden lea ásahan ruhtačoaggima.

– NSR lea addán ruhtadoarjaga, ja mii ávžžuhit miellahtuid ja earáid maiddái doarjut, dadjá NSR jođiheaddji Runar Myrnes Balto.

Dehálaš olles Sápmái

Jovna Vars Smuk lea NSR:a 2. evttohas Nuortaguovllu válgabires ja maiddái boazodoalli. Son oaivvilda ahte Nussir-ášši lea prinsihpalaš ášši mii guoská olles boazodollui olles Norggas.

Minerálaláhka ii doaimma

– Daid boazodoallobearrašiidda maidda dát guoská de lea leahkimis sáhka, ja raporttat čájehit ahte nu olu go bealli boazobargiin guovllus uhkiduvvojit jus Nussir-ruvke duohtandahkko. Dát čájeha ahte minerálaláhka ii doaimma ja ahte dan ferte rievdadit. Jus dát duođas leš lohpi, de gal ii leat nu čuvges boahtteáigi boazodollui, dadjá Vars Smuk.

Joatká Sámedikkis rahčat

Presideanttaevttohas Silje Karine Muotka, guhte ovddasta válgabiirre gosa ruvke lea plánejuvvon, oaivvilda ahte Nussir-ruvkke doaibmalobit rihkkot sihke álbmot- ja olmmošvuoigatvuođaid ja ahte daid dasto ferte geassit ruovttoluotta.

Mannan Sámediggeáigodaga áigge lea NSR ožžon masá ovttajienalaš Sámedikki cealkit Nussir-ruvkke vuostá. Sámediggeráđđi lea maid viggan váikkuhit investoriid, ja lea dorjon boazodoalu sihke áššeraporttaiguin ja doarjagiin vejolaš diggeáššiide.

Doaibmalobit rihkkot sihke álbmot- ja olmmošvuoigatvuođaid

– Mu mielas lea hui dehálaš joatkit doarjut riekteguddiid boazodoalus sin rahčamušain birgehit iežaset ealáhusa. Mii dárbbašit suvdilis ealáhusovdáneami Sámis, eatge luonddu- ja birasgoaridemiid mat duvdet dálá ealáhusaid nu mo guolásteami ja boazodoalu, dadjá Silje.

Váldogovva govvideaddji: Kjell Derås.