Moaitit ruvkemearrádusa Nussir-áššis

– Dát leat čáhppes bearjadat sihke lundui ja sámi vuoigatvuođaide. Mii moaitit mearrádusa garrasit, lohká Runar Myrnes Balto,  Norgga Sámiid Riikkasearvvi (NSR) jođiheaddji

Mearrádus lea stuora roassun sámi servodahkii, mii ovtta nuppi áššis vásiha ahte sámi ealáhusain ii leat suodjalus jagis 2019, vaikko lea gollan 40 jagi Álaheaju-ášši rájes.

– Sámi bearrašiid birgenláhki ja eallivuođđu billistuvvo go sin guotteteatnamat šaddet industriijaguovlun ja ruvkebázahusat nuoskkidit vuona. Bearrašat dovdet iežaset áibbas dorvvuheapmin ja rivttiid haga industriija ja eiseválddiid vuostá. Dát lea heahpatlaš rihkus sin vuostá, lohká Myrnes Balto.

– Ráđđehus čájeha dákko duođalaš badjelgeahččanvuođa. Ášši lea sihke birasskandála ja stuora rihkus hearkkes álgoálbmoga vuostá, ja dat lea duođalaš maiddái internationála dásis. Mu mielas lea issoras ahte dát lea vejolaš 40 jagi maŋŋel Álaheaju-ášši. Ii go Norga leat maidege oahppan?, jearra Runar Myrnes Balto, NSR-jođiheaddji.

Myrnes Balto dieđiha dál ahte son gohčču NSR liige stivračoahkkimii guorahallat maid organisašuvdna dál galgá dahkat, ja ahte son áigu ovddidit Nussir-ášši hoahppuáššin Sámedikki dievasčoahkkimii. NSR-jođiheaddji lohpida maiddái doarjaga vuoigatvuođalaččaide.

– Mii áigut doarjut vuoigatvuođalaččaid viidáseappot nu bures go sáhttit. Dán áššis oaivvildit mii ahte Norga eahpitkeahttá rihkku álgoálbmogiid vuoigatvuođaid, ja ahte mearrádus lea boastut. Danne joatkit mii iežamet rahčamušaiguin, loahpaha Myrnes Balto.