Boasttuvuođat Sámedikki jienastuslogus

Maŋimuš áiggi leamaš medias áššit mat muitalit mo muhtumat leat čálihan iežaset Sámedikki jienastuslohkui vaikko eai deavdde eavttuid. Norgga Sámiid Riikkasearvi (NSR) atná dán hui duođalažžan.

Maŋimuš áššis bođii ovdan mo Ovddádusbellodatpolitihkkár lea čálihan iežas jienastuslohkui boasstu vuođu alde, vaikko diđii ieš ahte ii deavddá gáibádusaid. Go lea vel Ovddádusbellodatpolitihkkár de čuožžila maid gažaldat ahte leago verrošeapmi politihkalaš sivaid dihtii.

• Sámediggi ferte dán váldit hui duođas ja guorahallat gallásiin lea sáhka. Lea badjelgeahččanvuohta go olbmot iešdáhtus rihkkot lága ja dan láhkai duššindahket min vuogádaga. Mii fertet guorahallat gallásiin lea sáhka, vai mii beassat doaibmabijuid bidjat johtui njulget dien dili. Buohkat ánssášit ahte min parlameanta, Sámediggi, lea legitima jietna sámi álbmoga ovddas, dadjá Beaska Niillas, Parlamentáralaš jođiheaddji Norgga Sámiid Riikkasearvvis.

Sámediggi meannudii gieskat ášši mannan Sámediggeválggaid birra. Dán áššái čálii NSR ovttas Gb`ain ja JSL`ain mearkkašumii mas dáhtuimet Sámedikki guorahallat manne olbmot dieđihit eret jienastuslogus, ja ahte ferte guorahallat gallásiin lea sáhka mat eai deavdde goappaš eavttuid beassat čálihit jienastuslohkui. Bargiidbellodat doarjjui mearkkašumi. 

• Daid mediaáššiid vuođul de jáhkán min diehtu Sámediggái ahte ferte guorahallat dán váttisvuođa viidodaga, nu mo dagaimet mannan bearjadaga, lea hui áigeguovdilis ášši. Go mii fitnet dieđuid de mii fertet geahčadit makkár doaimmaid sáhttit bidjat johtui vai boahtteáiggis ge sáhttit čađahit válggaid mas legitiimma áirasat besset ovddastit sámi álbmoga, ja eai ge eará álbmogiid, loahpaha Beaska Niillas.

Leat guokte eavttu beassat čálihit ieažas jienastuslohkui:

Vuosttaš lea ahte gálgá julggaštis ahte atná iežas sápmelažžan, ja nubbi lea ahte juogo a) lea sámegiella ruovttugiellan, dahje b) leat dahje leat leamaš vánhemat, áhkut/ ádját dahje máttarvánhemat geain lea/lei sámegiella ruovttugiellan, dahje c) lea olbmo mánná gii lea/ lea leamaš jienastuslogus, sáhttet gáibidit fievrriduvvot jienastuslohkui.