Ovddida ášši giđđaloddema birra Sámediggái

– Giđđalodden lea Guovdageainnus árbevierru ja boares vierru, ja loddemis lea midjiide hui nana kultuvrralaš čanastupmi, sámi álbmogii mii dáppe orru, dadjá Klemet Erland Hætta, Norgga Sámiid Riikkasearvvi Ávjovári sámediggeáirras.

NSR ii lea duhtavaš dainna mo Miljødirektoratet dál lea giđđaloddema reguleren, ja oaivvilda ahte dán loddema ii sáhte dadjat soahpá vieruiduvvan vugiide mat árbevirolaš loddemis leat geavahuvvon.

Earredássi lea nu vuollin ahte lea veadjemeahttun dadjat ahte lodden maid direktoráhta suovvá soahpá sámi boares vieruide.

– Go loddejeaddjit eai beasa ruoktot bearrašii buktit eanet go ovtta lotti, de giđđalodden ii oaččo dan árvvu maid galggašii rolla ovddas mii das lea sámi luonddudállodoalus ja árbevierus. Earredássi lea nu vuollin ahte lea veadjemeahttun dadjat ahte lodden maid direktoráhta suovvá soahpá sámi boares vieruide maid eamiálbmot- ja olmmošvuoigatvuođat galget suodjalit, Hætta dadjá.

– NSR háliida ášši bidjat áššelistui vai ii galgga leat makkárge eahpádus das ahte Sámediggi oaivvilda otná giđđaloddenregulerema Guovdageainnus rihkkut sámi boares vieruid, evttohusovddideaddji Klemet Erland Hætta loahpaha.

Govven: Kenneth Hætta