MIELLAHTTOOČČODEAPMI

Geassi lea fiinna áigi, go dalle mii lávet dávjjibut deaivvadit somás sosiála oktavuođain. Don soaittát deaivvadit boares ustibiiguin Riddu Riđus dahje Márkomeanus, festiválain maid NSR báikkálašsearvvit okte áiggis álggahedje? Dahje soaittát fitnat gáfestallame gilikafeas dahje guovddážis gos miellahtut dollet gáktegoarrun- ja giellakurssaid? Dahje soaittát váris váccašeame ja de deaivvadat muhtin olbmuin gean don háliidivččet oažžut fárrui vuosttildit sámi luonddu billisteami. Leat álo valjit vejolašvuođat oččodit ođđa miellahtuid NSR:ii!

Miellahttooččodanáigodat bistá suoidnemánu 12. beaivvi rájes gitta golggotmánu 31. beaivvi rádjái. Mii lohpidit fiinna vuoittuid sutnje gii lea oččodan eanemus miellahtuid ja vel muhtin ođđa miellahttui gii lea searvan dán áigodagas.

Miellahttu ferte ieš dieđihit iežas mielde: juogo dan bokte ahte deavdá dieđihanskovi nsr.no- siiddus (čále kommentára-/gažaldatsadjái gii du lea oččodan searvat); dahje dan bokte ahte sáddet SMS nummarii 2090 kodasániin NSR MEDLEM [namma čujuhus e-poasta riegádandáhton oččodeaddji namma] (omd. NSR MEDLEM Bertil Brakkvann Fjordgata 1 8101 Nordpå bertil@brakkvann.sa 06.12.1917 Duoddara Giron sáddejuvvo nummarii 2090).

Lea vuogas jus oččodeaddji ieš maid sádde e-poastta čujuhussii nsr@nsr.no dahje SMS nummarii +47 988 50 273 mas muitala gean son lea oččodan searvat.

Lihkkosávaldagat ja buorre #NSRčakča 2019!

———-

Eavttut:

• Ođđa miellahttun rehkenastojuvvo son guhte ii leat máksán miellahttomávssu 2018:s dahje suoidnemánu 11. beaivvi 2019 rádjái.
• Ođđa oččoduvvon miellahttun lohkkojuvvo dušše jus miellahttomáksu lea máksojuvvon ovdal go miellahttooččodanáigodat loahpahuvvo.
• Váldomiellahtut (riegádan 1900–1993) addet 1 čuoggá, ja BU-miellahtut (riegádan 1994–2019) addet 2 čuoggá vervengilvvus.
• NSR bargit eai sáhte oažžut vuoittuid kampánjjas.