#DoarváiDál – ii šat sámevašši

Sámevaši gávdná gáhtaid alde, skuvllain, bargosajiin ja interneahtas. Vaššiságat váikkuha min psyhkalaš dearvvašvuhtii ja dál gáibiduvvo ahte mii čielgasit cealkit ahte dál lea doarvái. NSR bargá sámevaši vuostá buot dásiin. Dál lea duođai doarvái.

Kategori
NSR
Forfatter
NSR
Dato
18.08.2021
NSR

#DoarváiDál – ii šat sámevašši

– Mu buolvvas mii leat dolkan, ja mii eat šat dohkket ahte ain gártat vásihit cielahemiid ja vaššiságaid, dadjá Maren Benedicte Nystad Storslett, NSR Nuoraid jođiheaddji ja NSR:a 2. evttohas Ávjovári válgabires.

Mu buolvvas mii leat dolkan.

Ovttas NSR Nuoraiguin son dál fuomášahttá sámevaši DoarváiDál-prošeavtta bokte. – Podcastta ja sosiála mediaid bokte mii geahččalit olahit, čuvgehit ja čohkket nuoraid sámevaši vuostálastimii. Mii eat jáhke stuorámus váttisvuohta lea min buolvvas, muhto mii aŋkke sáhttit mielde rievdadit dili, dadjá Nystad Storslett.

Romssas lei doarvái

NSR-jođiheaddji Runar Myrnes Balto ássá Romssas gos dál searvá válggaide NSR:a njunuševttohassan Gáiseguovllu válgabires. Son lei fárus bidjamin johtui #DoarváiDál lihkadusa sámevaši vuostá dan maŋŋá go juovlamánus gávpogis dáhpáhuvai sámecielahan-dáhpáhus busses.

Mii bovdiimet olles gávpoga searva

– Mii bovdiimet olles gávpoga searvat, ja sihke suohkanstivra, ásahusat, valáštallanbiras ja eaŋkilolbmot serve, muitala Myrnes Balto, guhte oaivvilda ahte sámevaši ii sáhte jávkadit jus stuorraservodat ii searvva.

– Danne lean liige ilus go oaččuimet johtui ovttasbarggu mas Romssa valáštallansearvi lea váldán badjelasas stuorra ovddasvástádusa. RomsaDál-prošeavtta bokte leat dál sihke stuorábuš ja smávva aktevrrat gávpogis ovttasbargamin loktet oidnosii sámevuođa positiivvalaččat, ja dan bokte de soaitá vaššiságaid eastadit, dadjá NSR-jođiheaddji.

Givssideapmi ja neahttacielaheapmi

– Lea áibbas dohkkeheapmi ahte sámi mánát skuvllain vásihit givssideami iežaset nama dahje gullevašvuođa dihtii. Seammá gusto givssideapmái bargosajiin. Go sápmelaččat ain vásihit ahte earát áddestaddet sin dárogielsuopmana, de mis lea gal servodatváttisvuohta man fertet dohppet, ja dan ferte dohppet jođiheddjiid dásis, dadjá Nystad Storslett.

Danne lea NSR Sámedikkis bidjan johtui barggu ráhkadit neahttakurssa mas skuvllajođiheaddjit, oahpaheaddjit, fitnodatjođiheaddjit ja eaktodáhtolaš birrassiin galget oahppat dovdat, gieđahallat ja eastadit sámevaši.

Mii dárbbašit láhka ja politiijasuoji dás.

2021:s lea sámevašši ain hui oidnosis sosiála mediain ja kommentárasiidduin, ja muhtumin de šaddet nu gohčoduvvon skádjakámmárat gosa báhcet sihke váralaš ja uhkideaddji kommentárat.

Mun váiden ovtta cielaheaddji duo giđđat, guhte čálii EDL skádjakámmáris Facebookas ja doppe dat diktet sámecielaheaddji kommentáraid orrut gažakeahttá. Mii dárbbašit láhka ja politiijasuoji dás. Sámiid ja elliid áitin ii leat dohkálaš, ja dan ferte bissehit.  Olbmot gal sáhttet luohtit ahte NSR gal áigu bargat sámevaši vuostá, loahpaha Myrnes Balto.