Bures boahtin ođđa neahttasiidui

– Mii leat hui illosat go dál NSR beassá áibbas ođđa ja ođđaáigásaš neahttasiiddu čájehit. Dát siidu lea up-to-date daid gáibádusaid ektui maid ođđa digitála máilbmi lea buktán, dadjá NSR-jođiheaddji Runar Myrnes Balto.

Álggaha válgagičču

NSR lea válljen geavahit dán liibba 2021 válgagičču álggaheapmái.

– Heive hui bures ahte neahttasiiddut leat gárvásat justa áigái ahte beassat almmuhit buot iežamet evttohasaid ja maiddái iežamet buori politihka mainna Sámi bealis searvat válggaide čavčča válggaide, dadjá NSR-jođiheaddji.

Son jáhkká neahttasiidu sáhttá šaddat beaktilis reaidu válgagiččus.

– Dákkár áiggis mas lea vel pandemiija, de lea vuogas ahte lea buorre vuolggasadji digitála válgagižžui. Midjiide lea hui dehálaš ahte jienasteaddjit álkit gávdnet dehálaš dieđuid, ja dál mis lea neahttasiidu mii lea bures laktojuvvon maiddái sosiála mediaide, dadjá Myrnes Balto.

Báikkálaš Sámi gelbbolašvuohta

Neahttasiiddu lea Árvu hábmen ja Vitikka koden, ja ovttas leat sii hui buriid digitála čovdosiid buktán Sápmái.

Sihke Árvvus ja Vitikkas lea hui nanu gelbbolašvuohta.

– Sihke Árvvus ja Vitikkas lea hui nanu gelbbolašvuohta. Dát leat goappašagat buorit ovdamearkkat dakkár gelbbolašvuođafitnodagain maid mii sávvat vel eanet ovdánahttojuvvojit sámi servodagain. Dat váldet atnui daid vejolašvuođaid mat gávdnojit digitála ovdáneami bokte ja dainna leat áŋgiruššan. Lean ilus go mii dál leat beassan ávkkástallat sin gelbbolašvuođain, dadjá Myrnes Balto.

Árvu oaččui maid 112.500 2018’s ja 130.000 2019`s álggahandoarjaga NSR-stivrejuvvon sámediggeráđis, go NSR dáhttu doarjut sámi báikkálašservodagaid ealáhusovdáneami.

– Mun jáhkán sámediggeráđđi deaivvai bures dieinna vuoruhemiin, dadjá Runar Myrnes Balto. – Sii buvttadit issoras buriid buktagiid.

Sámeservviide iežaset siiddut

Dasa lassin ahte neahttasiidu lea sihke čábbásut ja eanet áigeguovdil go ovddit siidu de dat lea maid ráhkaduvvon nu ahte dan galgá leat álki geavahit, sihke gussiide ja NSR’a báikkálaš servviide. Buot sámeservviin lea dál vejolašvuohta doaimmahit iežaset vuollesiidduid maid lea álki geavahit.

Buot sámeservviin lea dál vejolašvuohta doaimmahit iežaset vuollesiidduid maid lea álki geavahit.

– Dát lea mu mielas hirbmat buorre ovdáneapmi mii sáhttá sakka geahpedit min báikkálaš servviid gulahallanbargguid. Čoavddus almmuhuvvo 2021 giđa. Mii leat maid jorgaleamen sisdoalu eanet sámegielaide. Ja doppe boahtá vel eanet, lohpida NSR-jođiheaddji.

– Min bargojoavku, mas prošeaktajođiheaddji Anne Henriette Nilut lea njunnožis, lea bargan issoras buori barggu, loahpaha Runar Myrnes Balto.