Aavosne Freavnantjahken gievrie bååstede båata

Gæjhtoe tjåanghkoeåvtehke.

“Domtoe goh daate dan vaestiedasse jalhts ibie daejrieh daan gyhtjelassem annje”

Nimhtie Suvi West soptseste sov dokumeenterefilmesne Máchhan – the homecoming gusnie prosessem fulkie saemien bååstede-sertiestimmine.

Tuhtjem dïhte sjïehteleslaakan buerkeste man åvteste daerpies mijjen aejlies daeverh utnedh mijjen dajvesne mijjen åålmegi lïhke. Dïhte aaj tjïerteste man åvteste saemieh edtjieh saemien kultuvreaerpiem eekedh, reeredh jïh bievnedh jïjtsh premissi mietie.

Stoerre saerniem fihkimh govledh ruffien gosse nænnoestamme Freavnantjahken gievrie gåatan båata. Sïjhtem Saemien sijtem garmerdidh, mij ïedtjem vaalteme prieviem tjaeledh jïh mænngan Saemiedigkine, Kultuvre jïh mïrrestallemedepartemetine, Nöörjen ambassadine Berlin:esne jïh Meiningen museuminie laavejosteme.

Ussjedh, daate gievrie ammes gïetine orreme 300 jaepieh. Mohte båetije asken aelhkebe gievriem bååstede meatan vaeltedh Tyskelaanteste Saapman, jïh rahkan 3.biejjien saemieh åadtjoeh jïjtjh gievriem dåastodh Saemien sijtesne.

Vååjnoe goh stuerebe goerkesem åadtjobe dagkerinie aamhtesinie. Seamma aejkien Saemien sijte orre museumegåetie krïevenasside illie ihke maahta kultuvredaeverh åadtjodh.

“Domtoe goh daate dan vaestiedasse jalhts ibie daejrieh daan gyhtjelassem annje”

Daerpies jienebh musumh, jïh institusjovnh evtiedidh. Dan åvteste Saemiedigkieraerie daam aamhtesem bæjjese lutnjie soptsestimmine Reerenassine. Mijjen stoerre vuartoeh båetije jaepien staahtebudsjeehtese jïh saemien gïele- jïh kultuvrelutnjemasse mah dah luhpiedamme.

Dovne Saetniesvoete jïh liktemekommisjoven reektehtse jïh Stoerredigkiebïevnese “Kunstnerkår” tjuvtjede daam seamma daerpiesvoetese jïh nuepiem vadta jåerhkedh dejnie barkedh.

Tjåanghkoeåvtehke, ih sïjhth goerehtalledh guktie maehtebe mijjen vuajnoeh jïh aarvoe politihkesne nuhtjedh? Daam faamoem mijjieh maadtojste eerpeme? Tuhtjem daam darjobe gellie aamhtesinie daan våhkoen Saemiedigkien stoerretjåanghkosne.