Romsa lea rivttes bálgá alde

Ná čoahkkáigeassá NSR-jođiheaddji Runar Myrnes Balto go čilge mo dilli lea Romssas. Son ássá gávpogis ja lea NSR:a njunuševttohas válgabires. Son lea áŋgiruššan sámi áššiid ovdánahttit Romssas, ja son oaivvilda ahte lea olu mainna sáhttá leat duđavaš. – Mii leat ožžon johtui buriid ovttasbargguid ollu aktevrrain mat loktejit áššiid ovttas, maiddái suohkaniin ja Romssa valáštallanservviin.

Mánáidgárdedáhkádus

Son lea maid hirbmat duhtavaš mánáidgárdedáhkádusain man NSR presideantaevttohas Silje Karine Muotka šiehtadii fárrui ovttasbargošiehtadussii.

– Dát gal lei bures dahkkon Silje bealis. Ja Romssa bargiidbellodat lei maid duostil go ii guldalan iežas sámediggejoavkku, mii garrasit vuostálasttii mánáidgárdesaji dáhkádusa, dadjá Myrnes Balto.

Oallugat váldet minguin oktavuođa ja muitalit ahte sámegieloahppofálaldat lea menddo hejot organiserejuvvon.

Gáhkkofeasta nogai

Muhto gáhkkofeasta masa Romssa Sámiid Searvi bovdii suohkanpolitihkkáriid maŋŋel ovttasbargošiehtadusa gárvema gal nogai.

–Dál ferte suohkan čoavdit skuvlaváttisvuođaid Romssas. Oallugat váldet minguin oktavuođa ja muitalit ahte sámegieloahppofálaldat lea menddo hejot organiserejuvvon. Earenoamážit nubbigiellaohppiide. Mii áigut dárkilit čuovvut ahte suohkan dál dahká barggu man lea geatnegahtton. Buohkat galggašedje oažžut fálaldaga masa lea vuoigatvuohta, loahpaha Myrnes Balto.

Mii dárbbašit viesuid

– Dál lea menddo divrras hukset viesu giliguovlluide, ja lea váttis gávdnat viesu dahje assodaga láigoheapmái. Sandra Márjá West ássá Olmmáivákkis Gáivuonas ja son vásiha ahte viessováilevašvuohta lea okta dain stuorámus hástalusain ealli sámi giliide.

NSR sirddolašvuođaplána heive bures sámi giliide Gáisi válgabires. Okta dain čuoggáin das lea ođđa viesso- politihkka mii lea heivehuvvon sámi giliide. Dása oaidná Sandra Marja West stuorra dárbbu. Son lea NSR 2. evttohas válgabires.

Daidda geat ásaiduvvet bearrašiiguin giliide šaddet erenoamáš divrras loanat, go viessoárvu gahččá dakkaviđe go lea huksen.

– Mun han lean ieš fárren ruoktot Olmmáivággái go ožžon barggu Riddu Riđđus, ja mun vásihan ahte lea hástaleaddji máŋgasiidda beassat láigohit, dadjá West.

– Muhto vearrámus gal lea go lea nu divrras hukset. Daidda geat ásaiduvvet bearrašiiguin giliide šaddet erenoamáš divrras loanat, go viessoárvu gahččá dakkaviđe go lea huksen. Dát lea vealgegillár man ádden bures ahte máŋgasat eai háliidivčče, oaivvilda West.

NSR háliida geavahit Viessobáŋkku aktiivvalaččat sihkkarastin dihtii hálbbit viessoloanaid giliin. – Mii háliidat ovttasbarggu gaskkal Sámedikki ja Viessobáŋkku mas ráhkaduvvo sierra prográmma mii sihkkarastá buriid viessoloanaid sámi giliin. Mii sáhttit háhkat nu olu bargosajiid ja fálaldagaid nuoraide go beare háliidat, muhto mii das ávkkiid jus eai gávnna báikki gos ássat?

Sandra Márjá West háliida ealli giliid olles Gáiseguovllu válgabirii, ja sus lea nana jáhkku ahte NSR:a 16-čuoggášas sirddolašvuođaplána lea veahkkin dasa.