Stáhta lea láhppon!

Sáhkavuoru lea Beaska Niillas čállán

NIM (Norges Institusjon for Menneskerettigheter) jahkedieđátus lea hui buorre reaidu, várra erenoamážit eiseválddiide, muhto maiddái midjiide. Mun ávžžutan buohkaid lohkat NIMa guorahallamiid ja árvvoštallamiid, go dain oahppá hui olu.

Doppe oahpan iežan bealis ahte eai leat dušše min sámiid vuoigatvuođat mat rihkkojuvvojit, muhto maiddái váldoálbmoga. NIM’a čállosat ja árvvoštallamat nannejit mu áicama ahte Norga ii leat makkárge olmmošvuoigatvuođaparadiijas, vaikko sii leat lihkostuvvan dakkár gova alddiiseaset ráhkadit máilbmái.

Fosenášši lea hui čielga ovdamearka das man boastut sáhttá mannat(…)

Dušše moadde ovdamearkka NIMa čállosiin; Fosenášši lea hui čielga ovdamearka das man boastut sáhttá mannat go addo huksenlohppi ovdal go rievttálašvuohta lea čielggaduvvon. NIM cuoigu maid ahte ii gávdno obbalaš árvvoštallan mo bihttáid mielde sisabahkken váikkuta sámi kultuvrii. Sii leat maid ovttaoaivilis minguin ahte sisabahkkejeaddjit eai sáhte joatkit válljet nu gohčoduvvon váikkutusguorahalliid main ii gávdno luohtámuš sámiid bealis ja geat eai leat iešheanálaččat iežaset árvvoštallamiiguin. Loahpas vel namhuan ahte maiddái doaimmat mat váikkutit dálkkádahkii, eai dušše arealaáššiide, leat maid algoábmotvuoigatvuođalaš áššit.

De dat lea buorre ahte Sámedikkis lea vieruiduvvan meannudit NIMa jahkedieđátusa. Ja háliidan loahpas giitit NIMa buori ja dehálaš barggu ovddas.

• Loga maid NIMs rapport “Menneskerettslig vern mot inngrep i samiske bruksområder”