Sámediggeráđđi lea reviderejuvvon bušeahtas árvalan juolludit 9,8 miljon ruvnnu, mas ráđđi vuoruha liigedoarjaga doaimmaide mat nannejit sámi servodaga. Stuorámus oassi dáin ruđain mannet mánáidgárddiide, museaide ja árbevirolaš sámi ealáhusaide.
Govven: Árvu / Marie Louise Somby
Sámediggi árvala 1,8 miljon ruvnnu bálkkáide sámi mánáidgárddiin ja 750.000 ruvnnu fas gelbbolašvuođa loktemii mánáidgárddiin.
– Lean duhtavaš go beasan čájehit vuoruhemiid maid dahkat sámi mánáidgárddiid ektui, ja dát liigedoarjja nanne sámi mánáidgárddiid ovdánahttima ja sámi mánáid mánáidgárde- fálaldagaid, lohká sámediggeráđđi Runar Myrnes Balto (NSR)
Museasuorggis, de vuoruhuvvo 1 miljon ruvnnu Davviálbmogiid guovddážii mat barget ođđa čájáhusain máhcahuvvon dávviriin, 300 000 ruvnnu árvaluvvo Savio-museai Mátta-Várjjagis ja 700 000 ruvnnu ges RiddoDuottarMuseai hálddašit dáiddačoakkáldaga mii stuorru dađis ja áimmahuššat dáiddačoakkáldaga mii boahtteáiggis galgá sámi dáiddamuseas. Muđui árvala ráđđi 500 000 ruvnnu Saemien Sijte almmolaš rahpamii geassemánus.
– Museasuorggis leat ollu dárbbut ja mii árvalat njealje konkrehta doaimmaid dán vuoro, ovdamearkka dihte museadávvirat mat máhcahuvvojit ruovttoluotta Davviálbmogiid guovddážii Bååstede prošeavtta olis, dadjá Myrnes Balto.
Sámediggi maid áigu geavahit 300 000 ruvnnu árvvoštallat vuotnaguolástanlávdegotti barggu ja nannet mearrasápmelaččaid guolástanvuoigatvuođaid. 250 000 ruvnnu árvaluvvo ges geahččalanprošektii meahccevuodjimis, 350 000 ruvnnu fas raporttas mas árvvoštallat mo suodjaluvvonguovllut doibmet. Lassin velá árvala sámediggeráđđi 800 000 ruvnnu čohkket dieđuid boazodoalo goavvejagiid vásáhusain.
– Beaiveálgu-soahpamušas de vuoruhuvvo addit sápmelaččaide vejolašvuođaid bargat árbevirolaš ealáhusaiguin ja dát oidno bures reviderejuvvon bušeahtas, lohká sámediggeráđđi Myrnes Balto.
Reviderejuvvon bušeahtas leat maid máŋga ovttaskasdoarjaga ja sámediggeráđđi álggaha maid doaimmaid mat nannejit sápmelaččaid sajádaga.
Govven: Árvu / Marie Louise Somby