Ođđa meahcástanpolitihkka Sámedikkis

– Mii fertet láhčit dili ahte álbmot beassá meahccái, dieđiha Per Johnny Sara, NSR 2.evttohas Davviguovllu válgabires.

Lea áibbas vejolaš sihkkarastit buori ovttaseallima gaskal álbmoga meahcásteami ja árbevirolaš ealáhusaid nu mo boazodoalu.

Áŋgiris meahcásteaddjin lea son ilus go beassá mannat válggaide ođđa ja áŋgiris meahcástanpolitihkain.

– Lea áibbas vejolaš sihkkarastit buori ovttaseallima gaskal álbmoga meahcásteami ja árbevirolaš ealáhusaid nu mo boazodoalu. Dávjá leat teknihkalaš gažaldagat mat čovdojuvvojit buori gulahallama ja buori plánafágalaš heiveheami bokte, dadjá Sara, guđes alddis leat vásáhusat areálaplánemiin iežas bargoeallima bokte.

Sara leage earret eará bargan boazodoallohálddahusain. NSRii lea dehálaš ahte álbmoga árbevirolaš meahcásteapmi nannejuvvo ja ahte beassan lundui sihkkarastojuvvo, earret eará dálu ja báikegottiid vuoigatvuođaid nannemiinna.

– Daid jagiid go lea olu muohta de láve gažaldat manne ii sáhte guhkidit láhttoáigodaga sihke skohteriidda ja čuigiide, dadjá Per Johnny Sara, guhte oaivvilda ahte dákkár áššiin lea stuorát báikkálaš mearridanváldi dehálaš.

Sámedikkis lea jo bargu jođus buoridit ohcama mainna galggašii oažžut johtui geahččalanortnega dihto gielddain mas jurdda lea láhčit dili dárbbašlaš mohtorjohtolahkii.

– Sámedikkis lea jo bargu jođus buoridit ohcama mainna galggašii oažžut johtui geahččalanortnega dihto gielddain mas jurdda lea láhčit dili dárbbašlaš mohtorjohtolahkii. Mii háliidat oažžut gielddaid mielde dása. Vásáhusat dán prošeavttas sáhttet leat buorre vuođđun dárbbašlaš rievdadusaide mohtorjohtolatlágas, dadjá Sara guhte lea áŋgir bargagoahtit dáinna.

NSR presideanttaevttohas Silje Karine Muotka doarju Sara. Son lohpida hoahpuhit bargguid meahcásteddjiid buorrin boahtte áigodahkii.

– Dán mii gal oažžut áigái. Dán áigodagas mii leat ruhtadan mohtorjohtolatlávdegotti barggu ja mii leat maid bidjan johtui doaimmaid čuovvulan dihtii lávdegotti árvalusaid. Mii bidjat johtui barggu meahcástandieđáhusain dakkaviđe boahtte áigodagas jus jienasteaddjit addet midjiide dan luohttámuša dáin válggain, lohpida Muotka.