Meahcásteapmi

Sámi álbmot galgá beassat eallit iežamet mehciiguin, areálaiguin ja luondduvalljodagaiguin, nu go mii agibeaivvi leat dahkan.

Kategori
NSR
Forfatter
NSR
Dato
08.09.2021
NSR

Meahcásteapmi

Sámi álbmot lea huksen iežas kultuvrra suvdilis luondduávkkástallamiin ja árbevirolaš ealáhusaid ala, dego boazodoalu, guolásteami, eanadoalu, duoji ja meahcásteami. Ferte láhčit dili dasa ahte árbevirolaš sámi ealáhusat sihkkarastojuvvojit ja ovdánahttojuvvojit, maiddái juridihkalaččat ja hálddahuslaččat.

Mii fertet ásahit oahpahusa árbevirolaš meahcásteamis!

NSR dáhttu boahtte áigodaga vel eanet vuoruhit meahcástanpolitihka, ja danne mii mannat válggaide dainna áigumušain ahte hábmet sámediggedieđáhusa meahcásteapmái ja min vuoigatvuođaide dasa.

– Mii NSR:as oaivvildat ahte galgá láhčit dili árbevirolaš meahcásteapmái ja ahte galgat beassat ávkkástallat ja buvttadit biebmu iežamet mehciin. Min gelbbolašvuohta álgoálbmogin ja min doaibmanávccat, geatnegahttet min áŋgiruššat buriid ja doaibmi etihkka- biras- oamastan- ja boađusjuohkinstandárddaid ovdii. Mii fertet sihkkarastit sámiid rivttiid ođasmuvvi luondduriggodagaid ávkkástallamii, nu mo min álbmot lea dahkan agibeaivvi. Dá lea bargu mainna NSR lea bargan álggu rájes, ja dáinna mii diehttelas joatkit, čilge Per Johnny Sara, meahcásteaddji ja NSR 2. evttohas Davviguovllu válgabires. 

Meahcásteami boahtteáigi

Dán áigái ii leat buohkaiguin vejolašvuohta ruovttus oahppat ja fitnet árbevirolaš máhtu, de seailluhan dihtii dán divrras gelbbolašvuođa ja árbbi de ferte oahpahuvvot ja dan láhkai seailluhuvvot eará láhkai. Mis lea áigumuš láhčit dili ahte ásahuvvo oahpahus árbevirolaš ja ceavzilis luondduávkkástallamis.

– Mii fertet ásahit oahpahusa árbevirolaš meahcásteamis! Dán láhkai sihke nannejuvvošii ja seailluhuvvoše min árbevierut. Dása gullet dieđus máŋga beali, ieš praktihkalaš máhttu ja birgendáidu, muhto sáhttá maiddái vuoigatvuođaide, hálddašanmáhtui ja iežamet árbevirolaš vuogádagaide hukset áddejumi. De dát šaddá hui gelddolaš bargu dál boahtte áigodaga, muitala Vidar Andersen, NSR 5. evttohas Gáiseguovllu válgabires.

Heivehit diliid dárbbuide

NSR bargá dan ovdii ahte olbmuid vejolašvuohta meahcástit heivehuvvo nu ahte beassat joatkit dainna, ja danne dáhttut mii geahčadit mo heiveha njuolggadusaid ja lágaid min dárbbuide. Lágat mat mearridit mo olbmuid árbevirolaš ealáhusdoaimmat ja meahcásteapmi hálddašuvvojit, fertejit doahttalit riikkaidgaskasaš álgoálbmotrivttiid, ja sihke sámi riekteáddejumiid ja árbevieruid.

Sámiide galget dohkke-huvvot geavahan- ja oamastanvuoigatvuođat iežamet čáziide, eatnamiidda ja luondduriggodagaide.

– Okta ovdamearka dás lea mohtorjohtolatláhka, dadjá Sara. – Jus dan galgat heivehit de fertet vuos guorahallat ja dahkat mearrádusaid mat vuhtii váldet buohkaid geat ávkkástallet mehciin, nu mo boazodoalu, dáloniid árbevirolaš ávkkástallama, luondduvalljivuođa ja eará. Mii dáhttut sihkkarastit ahte njuolggadusat ja lágat mat guoskkahit sámiid doahttalit riikkaidgaskasaš álgoálbmotrivttiid. Sámiide galget dohkkehuvvot geavahan- ja oamastanvuoigatvuođat iežamet čáziide, eatnamiidda ja luondduriggodagaide, ja dáid vuoigatvuođaid ferte čielggadit, loahpaha Per Johnny Sara.