Keskitalo ii hálit ođđasisválgga sámediggepresideantan

– Norgga Sámiid Riikkasearvvi (NSR) bealis háliidan giitit Ailli dan barggu ovddas maid son lea bargan sihke NSR:ii ja sámi álbmogii buorrin, dadjá Runar Myrnes Balto, NSR jođiheaddji.

Keskitalo lea leamaš sámediggepresideantan golmma áigodaga oktavuođas 2005 rájes, ja lea dál válljejuvvon presideantan 2017 rájes 2021 rádjái.

– Mun lean giitevaš dan luohttámuša ovddas maid sihke NSR ja sámi jienasteaddjit leat čájehan munnje, ja dáhkidan ahte áiggun geavahit buot návccaidan dan bargui mii ain galgá dahkkojuvvot dán sámediggeáigodagas, dadjá Keskitalo.

Keskitalo válljejuvvui NSR jođiheaddjin 2003:s, ja lea searvan presideantaevttohassan NSR ovddas njeallje háve. Dál oaivvilda Keskitalo ahte sihke sutnje persovnnalaččat ja organisašuvdnii lea áigi háhkat ođđa presideantaevttohasa.

Mii boahtit váillahit su sakka sámepolitihkalaš barggus.

– Aili lea leamaš politihkalaš láidesteaddjin Sámis dan rájes go vuosttaš nissonolmmožin válljejuvvui sámediggepresideantan 2005:s. Mii boahtit váillahit su sakka sámepolitihkalaš barggus, muhto mii ipmirdit bures ahte son dál háliida vuoruhit eará áššiid ovddasguvlui, loahpaha Myrnes Balto.

Čuovvovaš áiggis galgá NSR riikkastivra ovttas organisašuvnnain bargat gávdnat ođđa presideantaevttohasa 2021 sámediggeválgii. Lea NSR riikkačoahkkin mii loahpalaččat vállje ođđa presideantaevttohasa, dát dáhpáhuvvá Troanddimis golggotmánu 2.-4. beivviid.

Eambbo kommentáraid oažžu Aili Keskitalos telefovdnanummaris 971 29 305, ja Runar Myrnes Baltos telefovdnanummaris 977 73 778.

Govven: Sámediggi /Kenneth Hætta