Heahtedilli boazodoalus

Rávvet gierdavašvuođa ja áddejumi čájehit boazodoalu heahtedillái

Norgga Sámiid Riikkasearvvi (NSR) riikkastivra lea vuorjašuvvan olu boazosámi bearrašiid dilis go šaddet sihke koronadávdda ja goavvedálvvi gieđahallat oktanaga. Goappaš heahtedilit buktet stuorra hástalusaid eaŋkilolbmuide. Dasa lassin vásihit dál máŋggas boazodoalus fasttes cielahemiid go geahččalit meannudit dáid heahtediliid.

Ovdamearkka dihtii de leat máŋgga sajis dál šaddan giddet skohtermáđijaid mat leat guohtumiid alde  go bohccot dárbbašit dál guohtunráfi. Dákkár erenoamáš doaibmabijut sáhttet ges dađi bahábut buktit duhtameahttunvuođa eará olbmuide go justá dál eai beasa guovlluide mat dán áigodagas lávejit bivnnuhat. Mii diehtit ahte dađi bahábut álget máŋgasat dákkár oktavuođain cielahit boazosámiid sosiála mediain.

Dán lassin vásihit muhton boazodoallit ahte eai leat buresboahtimat geasseorohagaide go muhtumat ballet boazosámit sáhttet buktit koronadávdda go vulget geasseviesuidasaset, orohagaide ja nu ain.

NSR ávžžuha buohkaid leahkit gierdevaččat ja čájehit áddejumi boazosámi bearrašiidda mat leat dál gártan váttis dillái ja vuhtii váldit daid doaibmabijuid mat leat biddjon johtui veahkehan dihtii ealáhusa dán heahtedilis.

Go lea heahtedilli de fertet ovttasbargat ja mii fertet doarjut sin guđet rahčet. Mii doarjut boazodoalu dán váttis duppalheahtedilis.

Jearahallama ja gažaldagaid várás, váldde oktavuođa NSR jođiheaddjin Runar Myrnes Balto, tel 97773778.

Illustrašuvdnagovva: Carl Johan Utsi.