NSR

Lihkku eamiálbmogiid beivviin!

“Lihkku beivviin buot máilmmi álgoálbogiidda!”

Otne, borgemánu 9. beaivvi mii ávvudit riikkaidgaskasaš eamiálbmogiid beaivvi. Máilmmis gávdnojit birrasiid 5000 eamiálbmogat, ja oktiibuot dagahit 370 miljovnna olbmo. Máilmmi eamiálbmogiin leat olles 7000 giela, mii mearkkaša ahte leat eanet gielat go eamiálbmogat.

“2021:s lea ON lokten biebmovuogádagaid áigeguovdilin”.

Mii sámit leat eamiálbmot Norggas, Ruoŧas, Suomas ja Ruoššas, ja otne mii ávvudit oktasašvuođa ja oktiigullevašvuođa buot máilmmi eamiálbmogiin. Riikkaidgaskasaš eamiálbmotlihkadusa bokte leat mii olahan nannejuvvon dohkkeheami eamiálbmogiid vuoigatvuođain. Ovttasbargu eará álgoálbmogiin lea mearkkašan hui olu iežamet diliide dáppe ruovttus, earret eará ILO-soahpamuša nr. 169 ja ON álgoálbmotjulggaštusa bokte. Muhto aŋkke lea olu bargu ain vuoigatvuođaid hárrái, maiddái Norggas.

2021`s lea ON čalmmustahttán biebmovuogádagaid. Midjiide lea maid dehálaš nannet iežamet biebmosihkkarvuođa. Mis lea vuoigatvuohta ávkkástallat luondduriggodagaiguin min guovlluin, earret eará meahcásteami bokte. Ja min vuođđoealáhusain fertejit dorvvolaš rámmat. Mis leat varas ovdamearkkat das mo stáhta hálddašeapmi lea vearu guvlui doalvvuhan. Dán oaidná luossabivdohálddašeami, giđđaloddema, guolleeriid juohkima, boraspirehálddašeami ja boazodoalu ja árktalaš eanadoalu hálddašemiid ektui. Buoridan dihtii biebmosihkkarvuođa de oaivvildat mii ahte álgoálbmogiin ferte leat stuorát rolla luondduriggodagaid hálddašeamis ja sihkkaris riektevuođđu.  Sis guhte ellet luondduriggodagaid lahka lea eanet gelbbolašvuohta ja beroštupmi hálddašit daid suvdilis vugiiguin, mat sihkkarastet riggodagaid maiddái boahttevaš buolvvaide.

“2022`s álgá ON riikkaidgaskasaš logijahki eamiálbmotgielaide”

2022`s álgá ON riikkaidgaskasaš logijahki eamiálbmotgielaide, ja dát mearkkaša liige fuomášumi boahtte logi jagi eamiálbmotgielaid seailluhit ja ovdánahttit. Eamiálbmotgielat eai galgga bázahallot digitaliseremis. Ja riikkaidgaskasaš ovttasbarggu bokte lea vejolaš olahit daid stuora teknologiijafitnodagaid máilmmis.

Lihkku beaivviin buot máilmmi álgoálnmogiidde!