Evttohit sámi gilvvagordnefoandda

Šattolaš Sápmi barggus, Sámedikki ođđa ealáhusdieđáhus, evttohit Norgga Sámiid Riikkasearvi (NSR), Guovddášbellodat, Åarjel-Saemiej Gïehl ja Johttesámelista (JSL) ahte ásahuvvo sámi gilvvagordnefoanda.

– Dákkár gilvvagordnefoanda sáhtášii leat veahkkin ruhtadeamen fitnodagaid maidda lea doaivva ja investeremin daidda go dat álggahuvvojit, dan áigodagas go eanemusat dárbbašit ekonomalaš doarjaga, dadjá Ann Karin Kvernmo, NSR sámediggeáirras.

Gilvvagordnefoanddat dávjá bidjet smávit investeremiid fitnodagaide mat leat ásahuvvomin, ja danne sáhttet dákkár foanddat váldit stuorát riskka go foanddat mat bidjet stuorát investeremiid. Mo dákkár foandda galggašii ruhtadit ja hálddašit, dan fertešii eanet geahčadit.

– Otne gávdnojit iešguđetlágan investerenfoanddat ja gilvvagordnefoanddat, nugo Innovasjon Norges, muhto ii gávdno oktage ealáhusfoanda mas lea eamiálbmotfokus. Munnje lea deaŧaleamos ahte foanda ovddida ođasmuvvi ja guoddevaš ealáhusovdáneami, sámi eavttuiguin, Kvernmo loahpaha.