Evttoha mearrasámi Silje Karine Muotka presideanttaevttohassan

– Silje Karine Muotka lea hui buorre ja čohkkejeaddji evttohas. Maŋŋá go Álttá Sámiid searvi árvalii su presideanttaevttohassan de bohte doarjjareivvet sámeservviin miehtá riikka, dadjá NSR-jođiheaddji Runar Myrnes Balto.

– Riikkastivra jáhkká ahte Muotka lea rivttes evttohas ovddastit NSR’a 2021 sámediggeválggain. Sus lea hárjáneapmi, gelbbolašvuohta ja áŋgirvuohta olles sámi servodagas ja dát addá sutnje hui buori vuođu presideantaámmáhii, muitala NSR-jođiheaddji.

Sus lea hárjáneapmi, gelbbolašvuohta ja áŋgirvuohta olles sámi servodagas.

Viiddis doarjja

Dálá Sámediggepresideanta Aili Keskitalo muitalii geassemánus ahte ii dáhto joatkit. Das rájes leamaš NSR`as vuđolaš proseassa mas buot báikkálaš servviin leamaš vejolašvuohta árvalit evttohasaid, gitta golggotmánu 15. beaivvi rádjai. Silje Karine Muotka lea áidna evttohas guhte lea árvaluvvon ja sus lea viiddis doarjja ja eanaš báikkálaš searvvit dorjot su.

– Lean hui ilus go máŋga báikkálaš searvvi dorjot ja go riikkastivra mu evttoha presideanttaevttohassan. Dál áiggun geavahit áiggi mii lea ovdal riikkačoahkkima gulahallat báikkálaš servviiguin, jus sii dáhttot ja jus leat gažaldagat dahje eará áššit dán oktavuođas, dadjá Silje Karine Muotka.

Movttiidahttá

Muotkas lea guhkesáiggi vásáhus sámepolitihkas. Son lea jođihan máŋga sámesearvvi, NSR nuoraidlávdegotti ja maiddái NSR váldosearvvi. Son lea golbma áigodaga leamaš válljejuvvon Sámediggái, 2009 rájes, ja sus lea fargga 7 jagi hárjáneapmi sámediggeráđis.

Siljen mii oažžut presideantta guhte doarju juohke sápmelačča. Son háliida ahte buohkat lihkostuvvet.

– Hárjáneapmi lea dehálaš, muhto lea Silje gelbbolašvuohta – ja duohta mokta – olles Sámi álbmoga ektui mii movttiidahttá riikkastivrra. Silje lea jođiheaddji guhte nákce movttiidahttit ja boktit áŋgirvuođa áššiiguin bargat, seammás go lea jálus ja čielga sámi ovddasteaddji. Siljen mii oažžut presideantta guhte doarju juohke sápmelačča. Son háliida ahte buohkat lihkostuvvet, dadjá Runar Myrnes Balto.

NSR meannuda presideanttaevttohasválgga erenoamáš riikkačoahkkimis Romssas ođđajagimánu 30. ja 31.beivviid. Riikkastivra doaibmá guovddáš válgalávdegoddin ja riikkastivrra evttohus lea vuođđun presideanttaevttohasválgii.