Čállán: Maren Benedicte Nystad Storslett (Ávjovári válgabiire)
Ii leat dušše Sámedikki ovddasvástádus eastadit sámevaši ja cielaheami. Dat lea buohkaid ovddasvástádus, buot servodat dásiin.
Dat ii leat Sámedikki sivva ahte servodagas leat olbmot geain leat rasisttalaš oaidnu sápmelaččaide. Das sáhttet leat olu sivat, gos mun jáhkán diehtemeahttunvuohta ja cieggan ovdagáttut lea stuora sivvan.
Dasto oaivvildan ahte ii leat riekta ahte Sámediggi galgá guoddit dán ovddasvástádusa okto.
Mis lea dárbu ahte olle servodat váldá ovddasvástádusa eastadit rasisma ja cielaheami sápmelaččaid vuostá.
Dat lea buohkaid ovddasvástádus, buot servodat dásiin.
Doaibmaplánas lea evttohuvvon sihke dan maid Sámediggi sáhttá bargat, ja maiddai doaibmabijut maid earát sáhttet bargat. Okta ovdamearka mot ovttasbargat stuoraservodagain lea bivdit Ráđđehusa ráhkadit sierra nationála doaibmaplána sámecielaheami vuostá. Nubbi lea buoret gulahallan politiijain.
Dat mii guoská maid Sámediggi ieš sáhttá bargat lea earret eará evttohuvvon álggahit doarjjaortnega sámecielaheami hehttemii. Buorre ovdamearka buori doaimmas mii lea álggahuvvon lea RomsaDál, gos Tromsø Idrettslag (TIL) álggahii prošeavtta vai Romssa álbmot dovdá rámisvuođa ahte gávpogis leat sápmelaččat, sámegiella ja Sámi kultuvra.
Lea maid evttohuvvon ráhkadit sámecielaheami birra neahttakurssa jođiheddjiide, ja ahte Sámediggi galga ráhkadit bagadusa das movt sáhttá raporteret ja váidit sámecielaheami.
Mis lea buohkain, sihke Sámedikkis, ráđđehusas, sámi servodagas ja stuoraservodagas ovddasvástádus eastadit sámi cielaheami.
Doaibmaplánas maid evttohuvvo ahte Sámediggi ja Dásseárvo- ja vealahanáittardeaddji galgá 2022:s almmuhit dutkanprošeavtta mas ulbmil lea oažžut eanet máhtu rasismma birra maid nuorat leat vásihan geat gullet boazodollui.
Mis lea buohkain, sihke Sámedikkis, ráđđehusas, sámi servodagas ja stuoraservodagas ovddasvástádus eastadit sámi cielaheami.
