Ealli Sámi gilit!

Ealli sámi gilit sihke rittus ja siseatnamis lea okta geađgejulggiin sámi boahtteáigái, ja mii dárbbašat olbmuid Sámis!

Mii leat vuorjašuvvan go oallugat fárrejit Sámi báikegottiin, nu mo SSB olmmošlogostatistihkka mii almmuhuvvui maŋebárgga čájehii. Danne Norgga Sámiid Riikkasearvi dál almmuha iežamet sámi sirddolašvuođaplána mas 16 čuoggá:

1. Stuorát dorskeearit smávvafatnasiidda
2. Ruhtadan- ja innovašuvdnafoanda, nu mo sámi álggahanruhtadanfoandda.
3. Digitaliseren ja sámi giellaáŋgiruššan.
4. Vuođđoealáhusaid nannen, sihke boazodoallošiehtadusa ja eanadoallošiehtadusa bokte.
5. Buoret viessobáŋkoloatnaortnegat boaittobealguovlluin.
6. Ruhtadanortnegat almmolaš viesuid ja ođđa ja buoret skuvllaid huksemii.
7. Nuvttá mánáidgárdi
8. Nuvttá kulturskuvla mánáide
9. Nuvttá kulturskuvla nuoraide
10. Eanet astoáiggefálaldagat nuoraide
11. Eanet deaivvadanheivehuvvon ja digitála oahput allaskuvlla ja universitehtadásiin.
12. Johtalus- ja servodatprošeavttat buoret geainnuid, girdihámmaniid ja hámmaniid, mobiilafierpmádaga ja fibera várás.
13. Stuorát mánáidoaju eastadan dihtii mánáidgeafivuođa
14. Buoret dearvvašvuođafálaldaga, geahččalanprošeakta sámi E-doaktáriin.
15. Nuvttá vuodjenkoarta nuoraide
16. Seailluhit dehálaš doaibmabijuid nu mo studieloanaid sihkkumiin ja ii makkárge bargoaddidivat doaibmaavádagas.

Sápmi ja Norga dárbbaša boaittobealpolitihka mii buktá ássanhálu ja eallinmovtta ja mii eastada sosiála erohusaid.

– Mii oaivvildit ahte lea vejolaš jorgalahttit sentraliserema ja sihkkarastit ássama olles Sámis. Muhto dat gáibida duohta politihkalaš doaibmabijuid ja doaimmalaš ja duostilis boaittobealpolitihka, dadjá NSRa presideanttaevttohas Silje Karine Muotka.

Plána lea bures vuođuštuvvon sihke áššedovdiraporttaide ja guorahallamiidda, nu mo ráđđehusnammaduvvon boaittobeallávdegotti raporttaide ja Sámedikki cealkámuš davviguovvlodieđáhussii, ja dán sáhttá olahit go máŋga iešguđet oasálačča ovttasbarget.

– Jus galgat sihkkarastit fárrema Sámi guovlluide de fertejit máŋga iešguđet oasálačča ovttasbargat. NSR dáhttu geatnegahttit Sámedikki jođihit dán ovttasbarggu, dadjá Muotka.

Sápmi ja Norga dárbbaša boaittobealpolitihka mii buktá ássanhálu ja eallinmovtta ja mii eastada sosiála erohusaid. Mii fertet doaimmahit politihka mii addá olbmuide vejolašvuođa hukset ruovttuideaset, bajásgeassit mánáideaset ja ollašuhttit nieguideaset ealli sámi báikegottiin miehtá Sámi, loahpaha Muotka.

Sáhtát eanet lohkat NSR guovllupolitihka birra dán čállosis man Silje Karine Muotka lea čállán.