Dorskeearit riddoálbmogii!

Otná guolástuspolitihkka sirdá riggodagaid rittus Aker bryggii. NSR oaivvilda ahte dárbbašuvvo politihkka mii sihkkarastá mearrasámiid vuoigatvuođaid birget guolástemiin, ja ahte árvoháhkan bisána riddoguovlluide.

Kategori
NSR
Forfatter
NSR
Dato
04.08.2021
NSR

Dorskeearit riddoálbmogii!

Oktii go guovddáš dálvvi lei meara alde Máhkarávjju fávllabealde de ipmirdii Sandra Andersen Eira ahte háliidii guolásteaddjin šaddat.

– Mun dovden jođánit ahte dát lea juoidá mainna háliidan olles eallima bargat, dadjá Eira.

Dál son lea gearggus joatkit áŋgiruššat buoret guolás- tuspolitihka ovdii Sámedikkis boahtte áigodagas.

Politihkka sirdá árvvuid Romssa- ja Finnmárkku káijain Aker bryggii.

Vuorut smávvafatnasiid

– Dálá guolástuspolitihkka vuoruha stuorra troláriid ja áitá vuotna- ja riddoguolástusa. Politihkka sirdá árvvuid Romssa- ja Finnmárkku káijain Aker bryggii. Go unnida riddoguolástuseari ja rabasjoavkko eriid de dat áitá mearrasámi guolásteami ja báikegottiid miehtá rittu, dadjá Eira.

Sámediggeráđi lahttu Henrik Olsen, NSR:a 3. evttohas Gáiseguovllu válgabires doarju Eirra.

– Maŋŋá go eriid luite gávpegálvun de lea dál várra ahte šaddá láigolašvuogádat guolásteamis, go šárkabivdiin
ii leat várri oastit eriid, seammás go stuorrafanaseaiggádat dolvot guoli guhkás eret báikkálaš servodagain, dadjá Olsen.

NSR oaivvilda ahte mearrasámiid vuoigatvuohta guolásteapmái galggašii nannet lága bokte, nu mo maiddái sihke Riddoguolástuslávdegoddi ja Norgga olmmošvuoigatvuohtaásahus (NIM) leat árvalan. Mearrariggodagat leat vuođđun mearrasámi kultuvrii ja mearrasámi álbmoga riekti bivdui ferte čájehuvvot go earit juhkkojuvvojit.

Leat smávvafatnasat mat beaivválaččat buktet guoli gáddái guolleoastiide, mat sihkkarastet ahte guolleoastit ja bearrašat maid birgejit.

– Leat smávvafatnasat mat beaivválaččat buktet guoli gáddái guolleoastiide, ja mat sihkkarastet báikkálaš váikkuhusaid, ja ahte guolleoastit ja bearrašat maid birgejit, dadjá Olsen.

Diktet nuoraid guolástit

Okta Sandra oaiveáššiin lea nannet rekruterema guolásteapmái. Eira lokte ovdan dárbbu einnostahtti sisabohtui vai nuorat álggášedje bivdit.

Nuorat geat háliidit guolástišgoahtit fertejit maid eriid oažžut mat leat doarvái stuorrát ahte daiguin sáhttá bures birget.

– Doarjjaortnegat, nu mo Sámediggi lea ásahan, álkida olbmuide vejolašvuođa bivdigoahtit. Muhto nuorat geat háliidit guolástišgoahtit fertejit maid eriid oažžut mat leat doarvái stuorrát ahte daiguin sáhttá bures birget, dadjá Eira.

NSR bargá mearrasámiid beali

Mearrasámi guolásteapmi lea maŋimuš sámediggeáigodaga loktejuvvon hui oidnosii Sámedikkis. NSR lea bargan riddoguolástuseari ja rabas joavkku eriid suodjalemiin, ja ahte baicca sirdit eriid áhpenuohttebivdiin smávvafatnasiidda.

– Mun lean rámis ja duhtavaš go Sámedikkis beasan bargat guolástuspolitihkain. Munnje lea hui mávssolaš go gulan ahte olbmot ealáhusas oidnet Sámedikki dehálaš ásahussan guolástuspolitihkas. Go sii dadjet ahte mii bargat sin ovddas ja ahte dát guoská njuolga sin beaivválaš dillái, de lea munnje hui stuorra rápmi, loahpaha Sandra Andersen Eira.

  • NSR áigu bargat ahte álbmogat árbevirolaš mearrasámi guovlluin galget beassat hárjehit iežaset rivttiid sisaboađu ja birgejumi háhkat mearrariggodagain.
  • Loga eambbo min guolástuspolitihkka birra válgaprográmmas.