NSR riikkastivra lea mearridan rievdadit NSR 2020 riikkačoahkkinlágideami. Dát mielddisbuktá ahte ii šatta riikkačoahkkin Tråantes golggotmánu 2.-4. beivviid. Dan sadjái šaddá digitála riikkačoahkkin golggotmánu 2.-4. beivviid gos njuolggadusaid mielde mearriduvvon áššit meannuduvvojit.
Digitála riikkačoahkkin golggotmánus ja erenoamáš riikkačoahkkin ođđajagimánus
Kategori
NSRDato
11.08.2020
NSR
Digitála riikkačoahkkin golggotmánus ja erenoamáš riikkačoahkkin ođđajagimánus
Dán lassin plánejuvvo erenoamáš riikkačoahkkin ođđajagimánnui 2021 gos presideantaevttohas, válgaprográmma ja eará áššit mat loktejuvvojit meannuduvvojit.
Jus njoammudilli lea dan muttos ahte lea vejolaš čoahkkanit de dáhttut fysalaš čoahkkima doallat, muhto organisašuvdna ferte maid leat gearggus ahte dát ge čoahkkin soaitá šaddat digitálalaččat čađahuvvot.
– Go njoammu orro fas leavvamin servodagas de ii leat riikkastivrra oadjebas čađahit fysalaš riikkačoahkkima dán čavčča. Digitála riikkačoahkkin ii leat gal optimála, muhto lea buoret go hástalit dili dákkár seađas njoammudilis, dadjá NSR-jođiheaddji Runar Myrnes Balto.
– Vai šattašii buoremus vejolaš áššemeannudeapmi organisašuvnnas de mii juohkit riikkačoahkkima guovtti oassái. Dábálaš riikkačoahkkimis golggotmánus mii meannudat daid áššiid maid njuolggadusaid mielde galgat meannudit, nu mo bušeahtta, rehketdoallu ja doaibmaplánaid. Ja dalle báhcá buoret áigi meannudit daid stuorát áššiid dan erenoamáš riikkačoahkkimis, šattaš dal fysalaš vai digitála čoahkkin, dadjá NSR-jođiheaddji.