Dál lea áigi sámi dáiddamusea hukset!

Sámiid Vuorká-Dávvirat lea dál oassin Riddo Duottar museas – ja dat hálddaša badjel 5000 historjjálaš kulturdávvira, ja 800 sámi dáiddadávvira, mat lea čohkkejuvvon 1970 rájes. Ovdal geasi meannudii Sámediggi ođđa museaviesu ovttastahttinproseassa sámi dáiddamuseain ja Sámiid Vuorká-Dávviriin.

Sámi dáidda lea máilmmis njunnošis, ja dat ánssáša čájehuvvot sámiide, dážaide ja internationála gussiide, dohkálaš viesuin

– Mun lean ilus ahte mii dál fargga beassat duohtandahkat sámi dáiddamusea dan museaviesu oktavuođas Kárášjogas. Sámi dáidda lea máilmmis njunnošis, ja dat ánssáša čájehuvvot sámiide, dážaide ja internationála gussiide, dohkálaš viesuin, dadjá Máhtte, NSR`a 1. evttohas Ávjovári válgabires.

Daid duháhiid historjjálaš dávviriid gaskkas museas de gávdno earret eará Poala-Ándde goavddis, okta dain boarrásamos goavdáin mat duoguštuvvo dalle dain nu gohčoduvvon heaksáproseassain Sámis 1600-logus.

– Otná museaviessu lea menddo unni, ja dat ii leat heivehuvvon dan stuorra ja dehálaš bargui man musea dahká sámi álbmoga ovddas. Musea hálddaša stuorra oasi min sámi kulturárbbis ja musea dárbbaša sihke lanjaid ja magasiinnaid mat leat heivehuvvon ja mat dahket ahte mii sáhttit čájehit iežamet kulturárbbi albma láhkai, dadjá Mathis Nilsen Eira.

-Bååstede-prošeavtta oktavuođas galget vel eanet dávvirat máhcahuvvot norgga museain sámi museaide, nu mo Vuorká-Dávviriidda. Danne lea deháleabbo go goasge ovdal ahte mii hukset sámi musea mas lea gelbbolašvuohta, albma lanjat ja návccat hálddašit iežamet kulturárbbi, ii dušše alddámet otná beaivái, muhto boahtte čuođi jagi, dadjá Eira.

mun lean sihke rámis ja ilus ahte dál leat joavdan dan muddui ahte Sámi dáiddamusea ja ođđa museaviesu huksemat leat boađi boađi

Ovdal geasi de geatnegahtii Sámediggi iežas gokčat lasi viessoláiggu ja lasihit doarjaga RiddoDuottarMuseaide dan ođđa Sámi Dáiddamusea oktavuođas. Áilen Nigá Máhtte lea čielggas das ahte dáhttu Sámedikkis joatkit bargamis ođđa museaviesu nammii.

– Dát ášši lea hui dehálaš sihke Kárášjohkii ja maiddái olles Sápmái, ja dat lea ášši mii lea hui lahka mu váimmu. Dál mii leat bargan ođđa museaviesu fitnet badjel 30 jagi, ja mun lean sihke rámis ja ilus ahte dál leat joavdan dan muddui ahte Sámi dáiddamusea ja ođđa museaviesu huksemat leat boađi boađi.