Beaska Niillas válljejuvvon Sámi Parlamentáralaš Ráđi stivrralahttun

Beaska Niillas (NSR) válljejuvvui 04.11.21 Sámi Parlamentáralaš Ráđi (SPR) stivrralahttun. Sámediggepresideanta Silje Karine Muotka lea stivrras go lea Sámediggepresideanta. Muđui leat SPR stivrras Sámediggepresideanta Håkan Jonsson, Sámediggepresideanta Tuomas Aslak Juuso, Anni Koivisto ja Per Olof Nutti.

• SPR bargu lea okta dain min vuolggasajiin álbmogin bargat riikkarájáid rastá. Ovttasbargu stáhtarájiid badjel lea juoga mainna mis lea guhkes hárjáneapmi ja man mii vuoruhat hui dehálažžan iežamet politihkas, ja Beaiveálgu-julggaštus čujuha midjiide dehálaš áššiid maiguin dáhttut bargat. Buorre ovttasbargu ja hárjáneapmi riikkarájáid rastá bargat lea čoavdda rádjahehttehusaid njeaidimii. Boahtte áigodaga mis leat stuorra áigumušat ja mis lea buorre politihkka mainna sáhttá ovdánahttit sihke SPR`a ja Sámi boahtteáigái. Mun searvvan dása áŋgirvuođain ja illudan bargagoahtit, dadjá Beaska Niillas, parlamentáralaš jođiheaddji Norgga Sámiid Riikkasearvvis.

Sámi Parlamentáralaš ráđis (SPR) leat 21 lahttu mat válljejuvvojit Sámedikkiin Norgga, Ruoŧa ja Suomabeale. Norggabeale leat Beaska Niillas (NSR), Maren Benedicte Nystad Storslett (NSR), AIli Guttorm (NSR), Toril Bakken Kåven (Nkf) ja Ronny Wilhelmsen (Bb) válljejuvvon Sámedikki dievasčoahkkimis. Dáid lassin leaba Sámediggepresideanta Silje Karine Muotka (NSR) ja dievasčoahkkinjođiheaddji Tom Sottinen (Bb) lahttut.

• Mii vuoruhat SPR hui dehálažžan de mii leat ilus ahte Beaska Niillas váldá dán ovddasvástádusa. Mii jáhkkit ahte son sáhttá mielde nannet oktasaš Sámi ovttasbarggu. Sus lea guhkes hárjáneapmi ovttasbargat rájiid rastá ja son dovdá sámi servodaga bures, maiddái dain eará riikkain. Mii dáhttut nannet ja ovdánahttit SPR, ja Beaska Niillas lea rivttes olmmoš dán barggus, dadjá Maren Benedicte Nystad Storslett, parlamentáralaš nubbijođiheaddji Norgga Sámiid Riikkasearvvis.

SPR doaimmahanorgána lea stivra. Stivrras leat dat golbma Sámediggepresideantta ja okta lahttu juohke Sámedikkis. Dán áigái lea Sámediggepresideanta Silje Karine Muotka SPR-presideanta. Jođiheapmi sirdojuvvo dan golmma Sámedikki gaskkas. 

Oktavuohta: 

Beaska Niillas, tlf. +47 91856318, beaska@nsr.no

Maren Benedicte Nystad Storslett, +47 97122760, maren@nsr.no