Beaiveálgu-julggaštus

– Mii leat hui duđavaččat dáinna julggaštusain, dadjá Sámediggepresideanta Silje Karine Muotka. – Mii leat beassan ovttaoaivilvuhtii politihkain mii addá midjiide vejolašvuođa doarjut daid sápmelaččaid mat dan dárbbašit ja vel ovdánahttit sámi servodaga vel dobbeliidda, ja mun háliidan giitit sihke Guovddášbellodaga ja Johttisámi Listtu hui buriid šiehtadallamiid ovddas.

Julggaštus lea huksejuvvon Beaiveálgu vuoiŋŋa ala, vuosttaš sámi romána man, mearrasápmelaš Anders Larsen čálii 1912:s. Románas čuovvut Ábo Eira ja su bajásšaddama mearrasámi gilážis ja su mátki stuorraservodagas mii badjelgeahčča sámiid ja sámevuođa, gitta su moriheapmái go son dáhttui ovddidit sámegiela, sámi kultuvrra ja sámi historjjá.

Dás beassat lohkat Beaiveálgu-julggaštusa

– Dán áigodagas mii dáhttut earret eará vuoruhit sámi mánáidgárddiid ja pedagogaid, ealli sámi giliid ja buoret eavttuid sámi vuođđoealáhusaide. Mii sihkkarastit nanu Sámedikki mii sáhttá doarjut dan stuorra sámi girjáivuođa, dadjá Muotka.

– Duohtavuođa- ja seanadankommišuvdna gárve iežas raportta 2023:s. Dáruiduhttima váikkuhusaid gieđahallan lea juoidá mii guoskkaha sihke sámiid ja stuorraservodaga, ja dát gártá váikkuhit dán Sámediggeáigodaga loahpageaži. Seanadeapmi mearkkaša earret eará servodaga mas ii leat sámevašši, ja mii loktet eastadanbargguid sámevaši vuostá hui bajás Sámediggeráđis, dadjá Muotka.

Ovttasbargoguoimmit leat lassin politihkalaš julggaštussii boahtán ovttaoaivilvuhtii teknihkalaš ovttasbargošiehtadusain, mii muitala mo ovttasbargu galgá doaibmat. Das muitaluvvo earret eará ahte Sámediggeráđis galget vihtta ráđđelahtu, golbma NSR:ii ja vel sámediggepresideanta ja okta lahttu Guovddášbellodahkii. Juohke ovttasbargojoavkkus galgá okta politihkalaš ráđđeaddi guđesge.

Ovttasbargošiehtadus

Norgga Sámiid Riikkasearvi, Ávjovári Johttisápmelaččaid listu ja Guovddášbellodat leat dál almmuhan Beaiveálgu-julggaštusa ja ođđa Sámediggeráđi. Boahtte njeallje jagi de leat Sámediggeráđis Silje Karine Muotka, Runar Myrnes Balto, Maja Kristine Jåma, Mikkel Eskil Mikkelsen ja Hans Ole Eira.