Ođđa čállingottijođiheaddji

Aleksandersen lea Álttás eret ja orru dál Guovdageainnus, gos maiddái lea studeanta  boazoealáhus bacherlorprográmmas Sámi allaskuvllas. Son lea bargan čállin ja girkoverdden Guovdageainnu searvegottis, leamašan SAS servicemanager máŋga jagi ja ossodatjođiheaddjin Rema 1000 Guovdageainnus. Sus lea girjás oahppu. Earret eará davvisámegiela lohkanbadjeoahppu, árbevirolaš máhttu mas davviguovlluid resurssahálddašeapmi lea vuođđun, árbevirolaš sámi birasehtalaš vierut, ovdalaš sámi ealáhusláhki, otná árbevirolaš sámi ealáhusdoaimmat ja maiddái sámeriekti.

Aleksandersen dovdá NSR bures, go leamaš báikkalaš miellahttun Oslo Sámiid Searvvis, Mjøsan Dajven Saemien Siebre, Álttá Sámiid Searvvis ja dal Guovdageainnu Sámiid Searvvis. Son lea maid áŋgiruššan politihkii Guovdageainnu Sámilisttu ovddas.

– Munnje lea ovttasbargobiras dehalaš ja mus lea ollu beroštupmi mielbargiide ja bargodillái. Beroštan maid sámi árbevirolaš máhtus ja sámi ealáhusain. NSR:s leat ollu báikkalaš searvvit ja šaddá gelddolaš daiguin ovttasbargat buoridan dihte min sámi servodaga ja boahtteáiggi, lohká Aleksandersen.

Govva: Gurut bealis Thomas Myrnes Nygård, Aina Madélen Nordsletta Aslaksen ja Stian Aleksandersen

Thomas Myrnes Nygård joatká čállingottis konsuleantan ja ráđđeaddin olles áiggi. Geassemánus álggii Aina Madelén Nordsletta Aslaksen NSR-N čállin, ja NSR Sámediggejovkui lea maid dáid beivviid Elle Mári Dunfjell Oskal lávken ráđđeaddi ja čálli virgái. 

– Lea hui gelddolaš ja movttidahtti ahte dál leat ođđa olbmot boahtán min čállingoddái. Dát mielddisbuktá ahte mii dál sáhttit veahkehit min báikkalaš serviid vel eanet, ja joatkit lágidit dehalaš doaluid ja kurssaid sihke mánáide, nuoraide ja rávisolbmuide min báikkalaš servviin miehtá Norggas, lohká NSR jođiheaddji Beatrice Iren Fløystad.

Stian Aleksandersen bargá 50% čállingottis Guovdageainnus.

Gulahallandieđut:

stian@nsr.no

nsr@nsr.no