Bivdá sámediggeráđi loktet dárbbu girdišillju ásahit Guovdageidnui

Maren Benedicte Nystad Storslett (NSR), Guovdageainnu Sámediggeáirras, bivdá sámediggeráđi loktet dárbbu ásahit girdišillju Guovdageidnui go deaivvada ráđđehusain.

– Girdišillju Guovdageidnui lea leamaš politihkalaš ášši Guovdageainnus 50-logu rájes. Mis leat alla vuordámušat ođđa nationála johtolatplánii mii ovddiduvvo boahtte jagi. Dat ii vuoruhuvvon ovddit ráđđehusa johtolatplánas, vaikko lei evttohuvvon.

2024 giđa bidjá ráđđehus ovdan Nationála johtolatplána (NTP) 2025-2036. Nationála johtolatplána (NTP) lea dehálaš plána mii bidjá riika johtolatinfrastruktuvrra vuođu, ja ođđa plána áigodahkii 2025-2036 ovdanbuktojuvvo 2024 giđa. Das leat mihtut ja strategiijat dasa makkár ovdáneapmi johtolatsuorggis galgá leat boahttevaš jagiid. 

– Guovdageaidnu lea okta dain báikkiin Norggas gos lea guhkimus mátki buohccevissui. Guovdageainnu ja Hámmárfeastta gaskka, gos lagamus buohcceviessu lea, lea dávjá gittá luottat dálkki ja siivvu geažil, erenoamážit Silisávžžis ja Áisaroaivvis. Juoga mii dahká oktavuođa buohccevissui hui raššin. Ambulánsagirdiid ja girdiruvttuid ásaheapmi Guovdageaidnu, mas omd. girdimátkkit Romsii, oanidivčče mátki buohccevissui sakka. 

Guovdageainnu márkanbáikki olggobealde gávdno 1100 m girdibálggis. Dat ráhkaduvvui 2. máilmmisoađi áiggi, ja 1958:s Áibmosuodjalus ođastii dan. Odne doppe ii leat dábálaš girdijohtolat. 

– Dasa lassin lea siseatnamis eanet dássedis dálkkádat go mearragáttiin, mii mearkkaša ahte Guovdageainnu girdišillju doaivumis sáhtášii doallat rabasin, vaikko girdišiljut muđui fylkkas leat gitta. 

Našuvnnalaš johtolatplána (NTP) 2025-2036 barggu oktavuođas bovdejit Johtolatdepartemeanta ja Ealáhus- ja guolástusdepartemeanta politihkalaš gulahallančoahkkimiidda. 

– NSR Sámediggejoavku lea bivdán Sámediggeráđi buktit ovdan dárbbu ásahit girdišillju Guovdageidnui guovddáš vuoruheapmin dán barggus, loahpaha Nystad Storslett.