Jienastuslohku – čálit iežat ovdal Geassemánu 30. beaivvi

Áigemearri čálihit iežat jienastuslohkui lea Geassemánu 30. beaivi. De dál dat lea rivttes áigi dárkkistit ahte buohkat bearrašis leat čálihuvvon.

Gii sáhttá iežas čálihit?

• Buot sápmelaččat geat leat deavdán, dahje geat devdet 18 jagi kaleandarjagis ja guhte ásset Norggabeale Sámi sáhttet iežaset čálihit.
• Fertet iežat julggaštit sápmelažžan ja ferte leamaš sámegiella ruovttugiellan, juogo dus alddát dahje váhnemis, áhkus/áddjás dahje ovtta máttarváhnemis.
• Sáhtát maid čálihit iežat jus leat váhnemat guhte leat/leamašan čálihuvvon jienastuslohkui.

Mo čáliha iežas jienastuslohkui?

Lea hui álki iežas čálihit jienastuslohkui Sámedikki neahttasiidduid bokte go logge sisa ID-portála/MuID bokte.

1. Deaddil Logge sisa
2. Čuovo ID-portála sisaloggenbagadusaid
3. Dohkket sihke 1. ja 2. lávkki.

Lea maid vejolaš báberhámis čálihit iežas. Gávnnat skovi man sáhtát čálihit Sámedikki neahttasiiddus. Báberskovi sáhttá maid viežžat Sámedikki kontorbáikkiin.

Čálit iežat jienastuslohkui

Searvva miellahttun

Manne galggašit čálihit?

Galggašit iežat čálihit jus dáhtut Sámedikki mii:

• Oaidná sámi máŋggabealatvuođa nanuvuohtan, ja mii ii ohcal háddjemiid
• Dáhkida sámi vuoigatvuođaid ovdii bargat
• Stargadit dáistala sámi beroštumiid ovddas stuoraservodaga biekkaid siste
• Vuoruha giella- ja kulturfálaldagaid sápmelaččaide doppe gos ásset, ja mat dahket sámi giliid geasuheaddjin vai olbmot ásaiduvvet doppe

Jus doarjjut dáid de berret čálihit iežat vai beasat jienastit NSRa.

Dát válggat leat hui dehálaččat Sámedikki boahttevaš bálgáide, go mii vásihat vuostálastima mii dáhttu njeaidit olu dain mávssolaš áššiin maid mii leat huksen Sámis.

Mii dárbbašit du!

Veahket rekruteret

Vaikko ieš leat jo jienastuslogus de lea ávkkálaš gulaskuddat bearrašiin ja skihpáriiguin leatgo sii muitán čálihit. Leat erenoamážit nuorat guhte eai leat jienastuslogus, jogo dainna go eai dieđe ahte fertejit čálihit, dahje go eai leat dan jurddašan. Iskka buot iežat oahppásiin geat leat deavdán 18 jagi mannan válggaid rájes, dahje geat devdet 18 jagi dán jagi!

Muitte áigemeari Geassemánu 30. beaivvi ja muitte jienastit NSR!

Hei!
Čakčii beasat vuohččan jienastit stuorra- ja sámediggeválggain, Danne ávžžuhan du čálihit iežat sámedikki jienastuslohkui. Jus dan dagat de ii mearkkaš ahte fertet jienastit, muhto ahte lea vejolašvuohta dan dahkat. Go vaikko leat deavdán dahje deavddát 18 jagi válgajagis de it automáhtalaččat čálihuvvo jienastuslohkui (nu mo stuorradiggeválggaide). Ferte ieš dieđihit iežas ovdal 30.06.2021 jus dáhttu jienastit dán jagi Sámediggeválggain. Dán lea hui álki dahkat! Dá lea čujuhus sámedikki sisačálihansiidui. https://sametinget.no/politihkka/valga/samedikki-valgajienastuslohku/diediheapmi-jienastuslohkui/
Mun ja mii sávvat don geavahat iežat jienastanvuoigatvuođa! Sávan dutnje buori geasi! Fuom: Sáhttá gártat oalle láittasin jus lávket válgalatnjii ja doppe fuomášit ahte it muitán čálihit ovdal áigemeari, itge beasa jienastit.