Vuolgge oahpahallin!

Ortnega birra

Oahpahalli-ortnet lea johtui biddjon vai NSRa nuorra miellahtut galget beassat oahppat eanet sámepolitihka, NSR ja Sámedikki birra. Oahpahallin beasat mielde Sámedikki lávdegotte- ja dievasčoahkkimiin Kárášjogas. Dát sisttisdoallá buot daid rabas čoahkkimiid Sámedikkis, NSRa joavkočoahkkimiid, semináraid mat lágiduvvojit dan oktavuođas, ja sosiála lágideamit mat vel gullet dasa. Oahpahallái gokčojuvvo mátki, orrun, biebmu ja vel honorára.

Mo vuolgit oahpahalliin

• Buot NSR-miellahtut badjel 18 jagi sáhttet ohcat oahpahallin.
• Deavdde dán skovi:https://forms.gle/3bF3Myn1fjK5ao9q9

Lea NSR sámediggejoavku ja NSR nuoraidlávdegoddi geain lea ovddasvástádus dán ortnegis.

Jus dus leat jearaldagat ortnega birra, sádde e-boastta nsr-u@nsr.no dahje NSR sámediggejoavkoráđđeaddái aina@nsr.no.

Njuolggadusat oahpahalli-ortnegii

1. Oahpahalliortnega ulbmil lea ahte nuorra NSR-miellahtut besset oahpásmuvvat NSR politihkalaš doaimmain Sámedikkis, NSRa politihkain ja Sámedikkiin politihkalaš vuogádahkan. Dasa lassin galgá ortnet movttiidahttit nuorra NSR-miellahtuid áŋgiruššat sámepolitihkain.
2. Berošteaddjit sáddejit ohcama oahpahallin beassat ohcanskovi bokte, gos devdet iešdieđuid.
3. Lea vejolaš čuovvut sihke lávdegodde- ja dievasčoahkkima, dahjege osiid čoahkkinvahkuin. Čále áinnas ohcanskovvái man guhkká háliidat čuovvut.
4. Ohcanáigemearri lea 3 vahku ovdal čuovvovaš čoahkkinvahku.
5. NSR Nuoraidlávdegoddi ja Parlamentáralaš Jođihangoddi válljejit ovttasráđiid oahpahalli 3 vahku ovdal lávdegotte- ja dievasčoahkkimiid. Mii gohččut oahpahalli(id) oanehaš digitála čoahkkimii gos vástidat gažaldagaid ortnega birra.
6. Ohcci ferte leat deavdán 18 jagi árvvoštallojuvvot oahpahallin. Mis ii leat bajit ahkerádji oahpahalliortnegii, muhto jos leat máŋga ohcci de vuoruhit ohcciid geat leat vuollel 35 jagi.
7. Oahpahalli ja NSR čálliba oahpahalli-šiehtadusa, mas earret eará honorára šiehtadallojuvvo.
8. NSR joavkočállis lea váldoovddasvástádus oahpahalli-ortnegis ja lea oahpahalli váldo gulahallanolmmoš ovdal, čoahkkimii áigge ja maŋŋel čoahkkimiid.
9. Oahpahalli galgá:
   • válljet lávdegotti man oahpahalli galgá čuovvut olles lávdegodde- ja/dahje dievasčoahkkinvahku. Čuovvovaš lávdegottiid sáhttá válljet: Ealáhus- ja kulturlávdegotti (EKL), Plána- ja finánsalávdegotti (PFL) dahje Bajásšaddan-, fuolahus- ja oahppolávdegotti (BFOL).
   • ráhkkanit ja oahpásmuvvat áššiin mat meannuduvvojit Sámedikkis ja galget válljet ovtta ášši man čuvvot erenoamážit. Oahpahalli galgá čuovvut dan lávdegotti mas dát ášši meannuduvvo.
   • searvat joavkočoahkkimiidda, lávdegottečoahkkimiid ja dievasčoahkkimiid ja joavkočoahkkimiidda mat lágiduvvojit ovdal lávdegotte- ja dievasčoahkkimiid.
   • geavahit sosiála mediaid NSR sámediggejoavkku bealis.
   • maŋimustá mánu maŋŋel čoahkkimiid raporteret Sámediggejovkui ja Nuoraidlávdegoddái. Raporta galgá sisttisdoallat čilgehus doaimmain ja smiehttamušaid searvama ávkkálašvuođa ektui. Raporteren sáhttá čađahuvvot digitála čoahkkima hámis, dahje sáddejuvvot sisa čálalaččat.
   • válljet váldodoaimma čoahkkinvahkui. Earret eará sáhttá: media čuovvolit dan áššis maid vállje, čállit kronihkaid dahje lohkkiidreivviid, buvttadit sosiála mediaid sisdoalu, buvttadit sisdoalu NSR neahttasiidui dahje eará šiehtadusa mielde.
10. Čoahkkimiid áigge galgá Sámediggejoavku aktiivvalaččat inkluderet oahpahalli ja fuolahit ahte oahpahalli oažžu stuorra ávkki searvamis.
11. Mátki ja orruma gokčá NSR.