Ukraina-soađi birra

Romssa Sámi Searvvi mielas lea issoras čuovvut soađi mii dál lea Ukrainas, ja mii láitit garrasit Ruošša agrešuvnna. Dát áddemeahttun soahti rihkku duođalaččat álbmotrievtti ja vuđolaš olmmošvuoigatvuođaid. Mis lea buohkain vuoigatvuohta eallit oadjebas friddjavuođas.

Mii doarjut Ukraina ja dan álbmoga, ja ávžžuhit buohkaid čájehit solidaritehta ja olmmošlašvuođa dán gáibideaddji dilis. Mii jurddašit ja doarjut ukrainalaččaid geat juo orrot Romssas, ja daid geat leat boahtime – báhtareamen Ruošša veahkaválddálaš soađis. Váldot bures sin vuostá!

Mii maiddái jurddašit iežamet sámi oappáid ja vieljaid Guoládatnjárggas, ja ruošša álbmoga, go sin ovddabealde leat váttis áiggit:  sankšuvnnat, sensuvra ja sierravuohta máilmmis muđui. Maiddái sevdnjes áiggis galgat muitit ahte Ruošša siviilaálbmot ii leat seammá go Putina stivrengoddi.

Jahkečoahkkincealkámuš dohkkehuvvui duorastaga njukčamánu 24. b. 2022.