Sámedikki eanetlohku mas leat mielde Norgga Sámiid Riikkasearvi (NSR), Guovddášbellodat (GB), Johttisápmelaččaid listu (JSL) ja Åarjel-Saemiej Gïelh (ÅaSG) leat soahpan nuppástuhttit ovttasbargošiehtadusa maid bellodagat vuolláičálle go Sámediggi vuođđuduvvui 2017:s.
Nuppástusat Sámedikki ovddasbargošiehtadusas
Kategori
NSRDato
04.10.2019
NSR
Nuppástusat Sámedikki ovddasbargošiehtadusas
Nuppástus mielddisbuktá ahte Guovddášbellodaga Hans Ole Eira searvá sámediggeráđđái 1.1.2020 rájes. Eira deavdá dan ráđđeláhttosaji man Ellinor Marita Jåma (ÅaSG) 2017 šiehtadusa mielde livččii galgan váldit badjelasas 2019:s, ja mas Berit Marie Eira (JSL) lea leamaš dássážii. Boađusin das go Jåma dieđihii ahte son ii leat áigeguovdil doibmii, lei ahte bellodagat šaddet veaháš heivehallat šiehtadusa.
– Mii šattaimet veaháš nuppástuhttit šiehtadusa, ja mun lean ilus go visot bellodagat leat leamaš konstruktiivvalaččat ja veahkkálaga gávnnahan čovdosiid. Dál mii leat soahpan ođđasis juohkit posišuvnnaid, ja mii illudit buohkat joatkit dan buori ovttasbarggu lokten dihte sámi gielaid, kultuvrraid ja ealahusaid ja nannet sámi vuoigatvuođaid, dadjá sámediggepresideanta, Aili Keskitalo (NSR).
– Mun lean hui duhtavaš dainna bargguin maid Berit Marie Eira lea doaimmahan sámediggeráđis guokte jagi. Son lea leamaš mávssolaš min barggus iežas viiddis gelbbolašvuođain. Dál illudan ovttasbargat Hans Ole Eirain ráđis, ja mun jáhkán ahte maiddái son boahtá heivet doibmii bures. Vaikko leat ge alla vuordámušat, dadjá Keskitalo ráđđeláhtuid molsuma birra.
Ođđasis šiehtadallojuvvon šiehtadusas boahtá maiddái ovdal ahte Berit Marie Eira (JSL) álgá Sámedikki ealáhus- ja kulturlávdegotti nubbinjođiheaddjin.
