NSR ođđa Parlamentáralaš jođihangoddi

– Lean movtta go joavku lea dáhtton mu, Marena ja Sandra jođihit dán barggu ovddosguvlui. Vuolggán dása sihke vuollegašvuođain ja áŋgirvuođain. Lea han muhtumin stuorra ja hástaleaddji bargu, ja leat máŋga ášši ja beali mat galget sihke doaimmahuvvot ja doaibmat. Lihkus lea hárjáneapmi ovdalaččas, go lean ovdal ge leamaš dán rollas, dadjá Beaska Niillas.

Beaska Niillas lei 2013-2016 parlamentáralaš 2. jođiheaddji NSR’as, ja šattai jođiheaddjin 2016 go dalá jođiheaddji manai virgelohppái. Son ovddasta Nuortaguovllu válgabiirre ja lea Deanus eret.

– Dál lea ođđa miellagiddevaš áigodat Sámedikkis. NSRas lea leamašan buorre ovttasbargu Ávjovári Johttisápmelaččaid listtuin ja Guovddášbellodagain mannan áigodaga. Beaiveálgu-joavkkus lea dál buorre vuođđu viidáset ovttasbargui, dadjá Maren Benedicte.

Vaikko Maren Benedicte Nystad Storslett lea vuosttaš geardde dál Sámedikkis áirrasin de lea jo guhkesáigge politihkalaš vásáhusat.Son leamaš NSR Nuoraid jođiheaddji 2018 rájes ja lea maid finadan Sámedikkis várreáirrasin mannan áigodagas. Maren ovddasta Ávjovári válgabiirre ja lea Guovdageainnus eret.

– Lean gearggus veahkkin jođihit Beaivaálgu-joavkku. Lea hui fiinna sámediggejoavku, mas sihke hárjáneapmi ja ođđa návccát, dadjá Sandra Márja.

Ii Sandra Márjái ge leat amas bargu parlamentáralaš jođiheapmi. Son lea dál válljejuvvon goalmmát gearddi Sámediggái ja leamašan ovdal maid NSR joavkku parlamentaralaš jođiheamis. Sandra Márjá ovddasta Gáiseguovllu válgabiirre ja ássá dál Olmmáivákkis.

Oktavuođadieđut:

Beaska Niillas

91856318

beaska@nsr.no

Maren Benedicte Nystad Storslett

maren@nsr.no

Sandra Márjá West

sandramwest@gmail.com